ڕێکخراوی پزیشکانی بێسنوور: دەبێت شێوازی گەیاندنی هاوکارییەکانی غەززە بگۆڕدرێت

ئاڤا نیوز

ڕێکخراوی پزیشکانی بێسنوور ڕایدەگەیەنێت شێوازی گەیاندنی هاوکارییە مرۆیەکان لە غەززە لەڕێگەی بەردانەوەیان لە ئاسمان بەسەر سەری هاووڵاتیان بە " زۆر مەترسیدار و نامرۆیی" ناودەبات و داوای گۆڕینی شێوازی گەیاندنی هاوکارییەکان دەکات.

وێنە گەورەکە: جگە لە بۆردوومان و هێرشە ئاسمانییەکانی ئیسرائیل بۆ سەر کەرتی غەززە، دۆخی مرۆیی لەو کەرتە گەیشتووەتە ئاستێکی مەترسیدار و کارەساتبار، هاووڵاتییانی کەرتەکە بەدەست نەبوونی خۆراک و دەرمان و سووتەمەنی دەناڵێنن و تا ئێستاش بەهۆیەوە دەیان کەس گیانیان لەدەست داوە.

لێدوانی فەرمی: کارۆلین وێلمەن، بەرپرسی پڕۆژەکان لە ڕێکخراوی پزیشکانی بێسنوور ڕایگەیاند، شێوازی گەیاندنی هاوکاریە مرۆیەکان لەرێگە ئاسمانیەکانەوە  زۆر مەترسیدار و نامرۆییە، چونکە لە کاتی گەیاندنی هاوکارییەکان بارە خۆراکیەکان بەسەر هاووڵاتیاندا بەردەدرێتەوە و بەهۆی کێشە زۆرەکەیەوە دەبێتە هۆی گیانلەدەستدانیان،  هەندێکیشیان لە ناوچەکانی شەڕدا بەردەدرێنەوە کە گەیشتن پێی سەخت دەبێت.

بەرپرسەکەی ڕێکخراوی پزیشکانی بێسنوور ڕایگەیاندووە پێویستە نەتەوە یەکگرتوەکان سەرپەرشتی بەڕێوەبردنی پرۆسەی گەیاندن و دابەشکردنی هاوکارییەکان بکات.

زانیاریی زیاتر: تا ئێستا هیچ سیستمێکی دروست نییە بۆ دابەشکردنی هاوکارییە مرۆییەکان کە بووەتە هۆی بە فیڕۆدانی بەشێکی زۆر لە خۆراکەکان و مردنی هەزارەها کەس بەهۆی برسیەتی.