چوار گەنج لە ڕووباری خازر خنکان

ئاڤا نیوز

بەیانی ئەمڕۆ ڕووداوێكی دڵتەزێن لە نزیك گوندی قایماوای سەر بە قەزای بەردەڕەش ڕوویدا؛ چوار گەنج لە ئاوی ڕووباری خازر خنكان.

چیرۆكی سەرەكی: چوار گەنج كە خەڵكی قەزای بەردەڕەش بوون، بە مەبەستی خواردنی نانی بەیانی چوونەتە سەر ڕووباری خازر لەنزیك گوندی قایماوا، دوای ئەوەی كەلوپەل و خواردنەكانیان ئامادە دەكەن، یەكێك لەو گەنجانە بۆ مەلەكردن خۆی هەڵدەداتە ناو ئاو و دوای تێپەڕبوونی چەند خولەكێك نەهاتووەتە دەرەوە، هاوڕێیەكی ئەو بەدوایدا خۆی هەڵدەداتە ناو ئاوەكە بۆ ڕزگاركرنی، بەڵام ئەویش ون دەبێت و دوو هاوڕێكەی دیكەیان بۆ دۆزینەوەی هاوڕێكانیان، ئەوانیش خۆیان هەڵدەدەنە ناو ئاوەكەوە كە بە گووتەی شایەدحاڵەكانی نزیك لە ڕووداوەكە، هەرچواریان لە ئاوەكە نقووم دەبن و گیان لەدەست دەدەن.

لێدوانی فەرمی: بڕوا فاروق، قایمقامی قەزای بەردەڕەش بە ئاڤا میدیای ڕاگەیاند، دوای ئەوەی ڕووداوی خنكانی ئەو چوار گەنجە ڕوویداوە، هاوڕێیەكیان خەڵكی ناوچەكەی ئاگادار كردووەتەوە و خەڵكەكەش بەدەم ئەو گەنجە خنكاوانەوە چوونە، هەر چوار تەرمیان لە ئاوی ڕووباری خازر دەرهێناوە و تەرمەكان ڕەوانەی پزیشكی دادی ئاكرێ كراون، بەمەبەستی لێكۆڵینەوە لە ڕووداوەكە و ڕێكاری توێكاری جەستەیی قوربانیان.

پەیوەست بەم بابەتە: بەڕێوەبەرایەتیی بەرگری شارستانیی ئاكرێ، ڕووداوەكەی پشتڕاست كردەوە و ڕایگەیاند كە كاتژمێر 7ـی بەیانی ڕووداوی خنكانی چوار گەنج لە گوندی قایماوە ڕوویداوە.

ڕوونیشی كردووەتەوە، گەنجە خنكاوەكان بە ناوەكانی: ئوسامە محەممەد، لەدایكبووی 2003، مەحموود جەمال، لەدایكبووی 2004، بیلال كەمال، لەدایكبووی 2007، محەممەد كەمال، لەدایكبووی 2008 بوون.