سەرۆک بارزانی: بە کەمتر لەوە رازی نابین کە دەستوور بە گەل و هەرێمی کوردستانی داوە

ئاڤا نیوز

لە کاتی ماڵئاوایی باڵیۆزی ئەڵمانیا لە عێراق، سەرۆک بارزانی بە باڵیۆزی وتووە، ئێمە دەمانەوێ دەستوور جێبەجێ بکرێت، ئێمە شتێکی زیاتر لە چوارچێوەی دەستوورمان داوا نەکردووە، بەڵام بە کەمتریش لەوە رازی نابین کە دەستوور بە گەل و هەرێمی کوردستانی داوە.

ڕاگەیێنراوی فەرمی: ئەمڕۆ دووشەممە، لە سەڵاحەددین سەرۆک بارزانی، پێشوازی لە كریستیەن هۆهمەن، باڵیۆزی ئەڵمانیا لە عێراق و ئاڵبێرت ڤۆن ویتكێ، کونسوڵی گشتی ئەڵمانیا کرد و سەردانەکە دوای کۆتایی هاتنی ئەرکی هۆهمەن بوو لە ئەرکی باڵیۆزی. سەرۆک بارزانی، سوپاسی ئەڵمانیا و یەکێتی ئەوروپای کرد لەو پاڵپشتیانەی لە قەوارەی هەرێمی کوردستانییان کردووە.

سەبارەت بە پەیوەندییەکانی هەرێمی کوردستان و بەغدا وتی، "گەڕانەوە بۆ پڕەنسیپەکانی تەوافق و تەوازن و شەراکەت باشترین چارەسەرە و ئێمە دەمانەوێ دەستوور جێبەجێ بکرێت".

لەبارەی پێکهێنانی کابینەی نوێی حکومەت، سەرۆک بارزانی وتی، "دوای کۆبوونەوەی هەردوو مەکتەبی سیاسیی پارتی دیموکراتی کوردستان و یەکێتی نیشتمانی کوردستان تێگەیشتنی باشتر هەیە بۆ پێکهێنانی کابینەی نوێی حکومەتی هەرێم و ئومێدەوارین پێش هەڵبژاردنەکانی ئەنجوومەنی نوێنەرانی عێراق کابینەی نوێی حکومەتی هەرێم پێکبهێنرێت".

لەلایەکی دیکەوە: كریستیەن هۆهمەن، سوپاسی و پێزانینی بۆ ڕۆڵی سەرۆک بارزانی هەبووە، هاوکات پشتیوانی ئەڵمانیا و وڵاتانی ئەوروپای بۆ پێگەی دەستووریی قەوارەی هەرێمی کوردستان دووپاتکردەوەتەوە و ئاماژەی بەوەداوە، بوونی ژمارەیەکی بەرچاوی کونسوڵخانە لە هەرێمی کوردستان پەیامێکە دەبێت قەوارەی هەرێمی کوردستان پارێزگاری و بەرگری لێبکرێت.

بۆچوونی لایەنی بەرامبەر: باڵیۆزی ئەڵمانیا باسی ئەو سەرکەوتنانەی کرد کە هەرێمی کوردستان لە ژێرخانی ئابووری و ئارامی و سەقامگیری بەدەستیهێناوە، ئومێدی خواست هەمان پێشکەوتن و سەقامگیری لە شوێنەکانی دیکەی عێراقیش بێتەدی، هاوکات كریستیەن هۆهمەن وتی، ئەو نموونە بەرچاوەی لە بوارە خزمەتگوزارییەکاندا لە هەرێمی کوردستان هاتووەتە کایەوە بە تایبەت لە پرسی ئاو و کارەبا، لە عێراقیش هەمان ئەو ئەزموونەی هەرێمی کوردستان جێبەجێ بکرێت بۆ خزمەتکردنی هاونیشتمانیان.