لە کۆبوونەوەی ئەنجوومەنی وەزیرانی عێراق باسی مووچە دەکرێت

ئاڤا نیوز

چاوەڕوان دەکرێت لە پەراوێزی کۆبوونەوەی ئەمڕۆی ئەنجوومەنی وەزیرانی عێراق پرسی مووچە و شایستە داراییەکانی هەرێمی کوردستان بخرێتە بەر باس. 

لە پەیامنێرەوە: دەروون مەلا ناجی، پەیامنێری ئاڤا لە بەغدا دەڵێت: بڕیارە لە پەراوێزی کۆبوونەوەی ئەمڕۆی ئەنجوومەنی وەزیرانی عێراق پرسی مووچە و شایستە داراییەکانی هەرێمی کوردستان باس بکرێت. 

ئەوەی پێویستە بیزانیت: بەگوێرەی ئەو کارنامەی ئەنجوومەنی وەزیرانی عێراق ڕۆژی دووشەممە دەست ئاڤا کەوتبوو و تیایدا هاتبوو کە لە کۆبوونەوەی سێشەممەی ئەنجوومەنەکە بابەتی مووچەی مووچەخۆرانی هەرێمی کوردستان باس ناکرێت، بەڵام چاوەڕان دەکرێت لە پەراوێزی کۆبوونەوەکە گفتوگۆی لەبارەوە بکرێت.

زانیاریی زیاتر: ئاڤا زانیویەتی لیژنەکانی نەوت و داهاتی ناوخۆ و بودجە و بەبانکیکردنی مووچە، تاوەکو ئێستا ڕاپۆرتیان ئامادە نەکردووە، چاوەڕان دەکرێت هەر ئەمڕۆ وەزیرە کوردەکان لەگەڵ محەممەد شیاع سوودانی و وەزیری دارایی عێراق کۆببنەوە. 

زانیاریی بەدەستهاتوو: بەگوێرەی ئەو زانیارییانەی دەست ئاڤا کەوتووە، هەر لە کۆبوونەوەکەدا لەسەر دوای فوئاد حوسێن، وەزیری دەرەوەی عێراق، گفتوگۆ لەبارەی کاری لیژنە هاوبەشەکەی نێوان عێراق و هەرێمی کوردستان دەکرێت.