کۆمیسیۆنی عێراق دوو پارێزەری ئافرەت لە کاندیدی دوور دەخاتەوە

ئاڤا نیوز


کۆمیسیۆنی هەڵبژاردنەکانی عێراق بڕیاریدا بە دوورخستنەوەی دوو چالاکوانی بواری ئافرەتان لە کاندیدی بۆ پەرلەمانی عێراق کە دژی هەمواری یاسای باری کەسیی کاریان کردبوو.  

چیرۆکی سەرەکی: کۆمیسیۆنی هەڵبژاردنەکانی عێراق لە چەند ڕۆژی ڕابردوودا وردبینیی بۆ ناوی کاندیدەکانی هەڵبژاردنی پەرلەمان تەواو کرد و "بەهۆی تەواونەکردنی مەرجەکان" 70 کاندیدی دوورخستەوە.

زانیاریی زیاتر: هەر لە چوارچێوەی ئەو بڕیارەی کۆمیسیۆندا هاتووە، هەر یەکە لە قەمەر سامەرائی و زەینەب جەواد شەمحانی لە کێبڕکێی هەڵبژاردن دووربخاتەوە کە دوو چالاکوانی بواری مافەکانی ئافرەتنن و لە ماوەی ڕابردوودا بە تووندی دژی هەموارکردنەوەی یاسای باری کەسی وەستانەوە و ڕۆڵێكی بەرچاویان لە میدیاکان و چالاکی مەیدانی هەبوو لە دژایەتیکردنی هەموارەکە.

ڕاگەیێنراوی فەرمی: ڕۆژی دووشەممە، کۆمیسیۆنی باڵای سەربەخۆی هەڵبژاردنەکان ڕایگەیاند، کە هۆکاری دوورخستنەوەی قەمەر سامەرائی و زەینەب جەواد لە کاندیدبوونیان بۆ هەڵبژاردنی داهاتووی پەرلەمان بۆ لێدوانی نەشیاو و پێشێلکردنی ڕەوشتی گشتی و بنەماکانی ڕەفتاری باش دەگەڕێتەوە.

زانیاریی زیاتر: قەمەر سامەرائی و زەینەب جەواد هەردووکیان پارێزەرن و لە ماوەی ڕابردوودا چالاکوانێکی چالاک و سەرسەخت بوون، لە ساڵی ڕابردوو بە تایبەتی لە کۆتایی ساڵەکە لە کاتی ئامادەکردنی ڕەشنووسی هەموارکردنەوەی یاسای باری کەسیی ژمارە 188ی ساڵی 1959 لەلایەن پەرلەمانەوە و دواتر دەنگدان لەسەری دیارترین دوو کەسایەتیی بوون کە دژایەتیی هەموارکردنی ئەو یاسایەیان دەکرد و لە میدیاکاندا دەردەکەوتن و چەندین جار بەشداربوون لە خۆپیشاندانەکانی دژی حکومەت و گرووپە چەکدارەکان کردووە.

ئەوەی پێویستە بیزانیت: زەینەب جەواد ماوەی ڕابردوو لەلایەن هێزێکی حەشدی شەعبییەوە دەستبەسەرکرا و مۆبایلەکەی لێسەندرا، دواتریش هەندێک وێنەی تایبەتی لە تۆڕە کۆمەڵایەتییەکان بڵاوکرانەوە، تائێستاش کاردانەوەی ئەم دۆسیەیە لە شەقامی عێراق کۆتاییان نەهاتووە و وەک دەستبردن بۆ ژیانی تایبەتی ئەو خانمە لەلایەن هێزەکەی حەشدی شەعبییەوە لە قەڵەم دەدرێت.

ئەمەش بزانە: لە ساڵی ڕابردوودا بەهۆی چالاکییەکانی، سەندیکای پارێزەران بڕیاریدا قەمەر سامەرائی بۆ ماوەی ساڵێک قەدەغە بکات لەوەی پیشەی پارێزەرایەتیی بکات.