ئەمریکا هۆشداری دەداتە بەغدا: یاسای حەشد، سروشتی هاوبەشییە ئەمنییەکەمان دەگۆڕێت

ئاڤا نیوز

وەزارەتی دەرەوەی ئەمریکا، ناڕەزایەتیی واشنتنی لە هەوڵی پەرلەمانی عێراق بۆ دەرکردنی یاسای حەشدی شەعبی ڕاگەیاند و ئاماژەی بەوە کرد کە پەسەندکردنی یاساکە دەبێتە هۆی گۆڕینی سروشتی هاوبەشیی ئەمنیی دووقۆڵی لەگەڵ بەغدا.

لێدوانی ڕۆژنامەوانی: ڕۆژی سێشەممە 5ـی ئاب، تامی بروس، وتەبێژی وەزارەتی دەرەوەی ئەمریکا، لە کۆنگرەیەکی ڕۆژنامەوانیدا لە واشنتن، ڕایگەیاند: "ئێمە بە تووندی دژی دەرکردنی یاسای حەشدین کە پێگەی گرووپە چەکدارەکانی سەر بە ئێران و ڕێکخراوە تیرۆرستییەکان بەهێز دەکات."

ئەوەی پێویستە بیزانیت: پێشتر، توێژەرانی ئەمریکی لە ڕاپۆرتێکدا کە پەیمانگای "واشنتن" بۆ سیاسەتەکانی ڕۆژهەڵاتی نزیک بڵاوی کردبووەوە، هۆشدارییان دابوو لەوەی تێپەڕاندنی یاسای حەشدی شەعبی، چاکسازییە ئەمنییەکانی عێراق تێکدەدات و پۆشاکێکی یاسایی دەدات بەو گرووپانەی لە دەرەوەی دەسەڵاتی دەوڵەت کار دەکەن، لەنێویاندا ئەو گرووپانەی لەلایەن ئەمریکاوە وەک "ڕێکخراوی تیرۆرستی" پۆلێن کراون.

لەلایەکی دیکەوە: بەر لە دوو ڕۆژ ئەمریکا لەڕێگەی هەڵسوڕێنەری باڵیۆزخانەکەی کە بەغدا بە فەرمی نیگەرانیی قووڵی خۆی سەبارەت بە پێشنیازەیاساکانی تایبەت بە هێزەکان و دەستەی حەشدی شەعبی بە سەرۆکایەتیی پەرلەمانی عێراق ڕاگەیاند.

ئەمەش بزانە: پێشتر سەرچاوەیەکی سیاسیی ئاگادار کە قسەی بۆ میدیای عێراق کردبوو و ڕاگەیاندبوو، یاسای حەشدی شەعبی کە بڕیاربوو لەم خولەی پەرلەماندا دەنگی لەسەر بدرێت، دوا دەخرێت بەهۆی بەردەوامیی ناکۆکییەکان لەنێوان هێزە سیاسییەکان، بەتایبەتی لەنێو پێکهاتەی شیعەدا، سەبارەت بە پێکهاتە و ڕۆڵی داهاتووی حەشد.