بە گومانی بەقاچاخبردنی نەوت.. کەشتییەکی زەبەلاح لە ئاوەکانی عێراقدا دەستی بەسەردا گیرا

ئاڤا نیوز

هێزی دەریایی عێراق دەستی بەسەر کەشتییەکی نەوتهەڵگری زەبەلاحدا گرت کە ئاڵای لیبێریای هەڵکردبوو و نزیکەی 250 هەزار تۆن نەوتی ڕەشی بارکردبوو. دەستبەسەرداگرتنەکە لە نزیک بەندەری نەوتی بەسرە و لە کاتی پشکنیندا ئەنجام دراوە، بەهۆی نەبوونی بەڵگەنامەی فەرمی.

وێنە گەورەکە: ماوەیەکە باس لەوەدەکرێت ئەمریکا، عێراق تۆمەتبار دەکات بە تێکەڵکردنی نەوتی ئێرانی لەگەڵ ئەو نەوتەی خۆی هەناردەی بازارەکانی جیهانی دەکات و دەیفرۆشێت.

زانیاریی بەدەستهاتوو: سەرچاوەیەکی بەرپرس لە بەندەرەکانی عێراق ڕایگەیاندووە کە کەشتییەکە بە شێوەیەکی کاتی دەستی بەسەردا گیراوە و مۆڵەتی 48 کاتژمێری داوەتە کۆمپانیای خاوەنەکەی بۆ پێشکەشکردنی بەڵگەنامە فەرمییەکان، بەپێچەوانەوە دۆسییەکە ڕەوانەی دادگای عێراق دەکرێت.

لەلایەکی دیکەوە: شارەزای ئابووری، نەبیل مەرسوومی، ئاشکرای کردووە کە کەشتییەکە "گوماناوی بووە" و هیچ بەڵگەنامەیەکی فەرمی پێنەبووە".

مەرسوومی ڕوونیکردووەتەوە: "وا دیارە کەشتییەکە خەریکی بەقاچاخبردنی نەوتی ڕەش بووە بۆ دەرەوەی عێراق."

ئەوەی پێویستە بیزانیت: پێشتریش وەزارەتی نەوتی عێراق ڕایگەیاندبوو، لە دوو بەندەری پارێزگای بەسرە لە باشووری وڵات ژمارەیەک کەشتیی تۆمارکراون کە بەشێوەی نهێنیی و بەبێ مۆڵەت نەوتیان بارکردووە، بۆ ئەو مەبەستەش تەکنیکی پێشکەوتوویان بۆ یاریکردن بە داتەکانی تایبەت بە دیاریکردنی ناسنامەکانیان بەکارهێناوە، ئەویش بۆ شاردنەوەی شوێنی ڕاستەقینە و گۆڕینی ڕێڕەوەکانیان.