کارەبای 24 کاتژمێری دەگاتە ئیدارەی سەربەخۆی گەرمیان

ئاڤا نیوز

تیمی هەژماری من ڕایدەگەیێنێت، بڕیارە لە قۆناغی داهاتوو پرۆژەی ڕووناکی بگاتە ئیدارەی سەربەخۆی گەرمیان.

وێنە گەورەکە: پڕۆژەی ڕووناکی، یەکێکە لە پڕۆژە ستراتیژییەکانی حکومەتی هەرێمی کوردستان، لە کابینەی نۆدا بڕیاری لەسەر درا و کەوتە بواری جێبەجێکردنەوە، بەگوێرەی ئەو پلانەی دانراوە تاوەکو کۆتایی ساڵی 2026 کارەبای سەرجەم ماڵ و شوێنە بازرگانییەکان بە 24 کاتژمێری دەکرێن.

لێدوانی فەرمی: تیمی هەژماری من بە ئاڤا میدیای ڕاگەیاند: پڕۆژەی کارەبای 24 کاتژمێری ئەولەویەتی بۆ پارێزگاکانە، دواتر بۆ ئیدارە سەربەخۆکان، "پێشبینی دەکەین لە مانگی 1ی ساڵی 2026 پڕۆژەی ڕووناکی بگەیێنرێتە ئیدارەی سەربەخۆی گەرمیان".

ئەوەی پێویستە بیزانیت: تا ئێستا نزیکەی سێ ملیۆن کەس لە کوردستان لە پڕۆژەی ڕووناکی سوودمەند بوون و خاوەنی کارەبای 24 کاتژمێرین.

لەلایەکی دیکەوە: ئەمڕۆ تیمەكانی پرۆژەی ڕووناکی بە فەرمی گەیشتنە هەڵەبجە و دەستیان بە هەڵمەتی هۆشیاری و ئاگاداركردنەوە و دابەشكردنی فۆرم کرد.