دوو تیرۆریست پێش ئەوەی شوێنێکی حکومی لە سلێمانی بتەقێننەوە دەستگیرکران

ئاڤا نیوز

 

بەڕێوەبەرایەتیی گشتیی ئۆپراسیۆنەکانی ئاسایش، لە شاری سلێمانی ئاشكرای دەكات كە دوو تیرۆریست دەستگیر كراون كە بەنیاز بوون تەقینەوە لەنێو یەكێك لە بنكەكانی بەرگریی شارستانی لەو شارە ئەنجام بدەن.

 

چیرۆكی سەرەكی: بەگوێرەی بەڕێوەبەرایەتیی گشتیی ئۆپراسیۆنەکانی دەزگای ئاسایشی هەرێمی کوردستان دوو كەس بەنیاز بوونە لە دوو پیلانی تیرۆریستیدا ژەهر بخەنە نێو تانكیی ئاوی خواردنەوەی بنكەیەكی بەرگریی شارستانی لە سلێمانی و بۆمبێكیش بە ئۆتۆمبێلێكی بەرگریی شارستانی بلكێنن و بیتەقێننەوە.

 

ڕاگەیێنراوی فەرمی: بەڕێوەبەرایەتیی گشتیی ئۆپراسیۆنەکانی دەزگای ئاسایشی هەرێم ڕایگەیاند: دوای بەدواداچوون و لێکۆڵینەوەی ورد و کۆکردنەوەی زانیاریی هەواڵگری، لە ئەنجامی بڵاوبوونەوەی گرتە ڤیدیۆیەک لە تۆڕە کۆمەڵاتییەکان لەبارەی هەڕەشەکردن و تەقینەوە، دەستبەجێ توانیمان لە ئەنجامی بەدواداچوونەکان شوێنی تیرۆریستان لە شاری سلێمانی دەستنیشان بکەین و بە فەرمانی دادوەری لێکۆڵینەوەی ئاسایش لە ڕۆژی 22 تا 24-6-2025، دەستگیریان بکەین و یەکێک لە تیرۆریستەکان کارمەندی بنکەیەکی بەرگریی شارستانی بووە.

 

- دوای دانپێدانان دەرکەوت تیرۆریستان بەنیاز بوونە لە پیلانی یەکەمدا ژەهر بکەنە ناو تانکی ئاوی خواردنەوەی یەکێک لە بنکەکانی بەرگریی شارستانیی سلێمانی، لە پیلانی دووەمدا لەڕێگەی لکاندنی بۆمب بە ئۆتۆمبێلی بنکەکە تەقینەوە ئەنجام بدەن.
 
-ئێستا تیرۆریستەكان بە ماددەی(2)ی تیرۆر دەستگیرکراون و لێکۆڵینەوە لە دۆسیەکانیان بەردەوامە.