لە هەڵەبجە تۆمارکردن و وەرگرتنی ئەستۆپاکی فەرمانبەران بۆ دابەشکردنی زەوی دەستیپێکرد

ئاڤا نیوز

شارەوانی هەڵەبجە نەخشەی کەرتی ئەو زەوییانەی دەدرێت بە فەرمانبەران ئامادەکردووە و دوای وردبینی کۆتایی لە ناوەکان، دەست دەکرێت بە دابەشکردنی بەسەر ئەوانەی سوودمەند دەبن.

چیرۆکی سەرەکی: ناوی 10 هەزار فەرمانبەر و خانەنشین لە سنووری پارێزگای هەڵەبجە بۆ وەرگرتنی زەوی گەڕاوەتەوە، بەڵام ناوەکان پێویستیان بە وردبینی دیکە هەیە، چونکە بەشێکیان پێشووتر بە هۆکاری جیاواز سوودمەند بوون، ئێستا لەهەردوو کەرتی بامۆک و هەسەنئاوا شارەوانی زەوی ئامادەکردووە.

لێدوانی فەرمی: فەرحان عیزەت، وتەبێژی شارەوانی هەڵەبجە بە ئاڤای گوت، "لە قۆناغی تۆمارکردن و وەرگرتنی ئەستۆپاکی ئەو کەسانەین کە لە پرۆسەکە سوودمەند دەبن، بۆ ئەوەی هەڵاوێردی ناوەکان بکەین ئەوانەی پێشووتر بە هەر هۆکارێک سوودمەند بوون ناویان دەربهێنرێت، ئەم پرۆسەیەش کاتی پێویستە، ئەگەرنا کێشەی دابینکردنی زەوییمان نییە."

ئەمەش بزانێت: بە گوتەی وتەبێژی شارەوانی هەڵەبجە لەم قۆناغە تەنیا ئەو فەرمانبەرانە جیادەکرێنەوە کە سەروو 40 خاڵیان هەیە، هەروەها هەر کەسێک پێشووتر سوودمەند بووبێت بێبەش دەبێت یان دوو هاوسەر فۆڕمیان پڕکردبێتەوە یەکێکیان زەوی وەردەگرێت کە خاڵی زیاتر بێت.