وەزارەتی دارایی: 120 ملیارەکەی داهاتی ناوخۆ ئامادەیە و چاوەڕێی ڕێککەوتنین لەگەڵ بەغدا

سەردار

لە بەغدا شاندی هەرێمی کوردستان لەگەڵ تەیف سامی، وەزیری دارایی عێراق کۆدەبێتەوە و پرسی مووچە یەکلایی دەکرێتەوە و ئەگەر ڕێککەوتنەکە ئەرێنی بوو داهاتی نانەوتی مانگی شەش ڕادەست دەکرێت.

چیرۆکی سەرەکی: بەپێی لێکتێگەیشتنی نێوان هەولێر و بەغدا، دەبێت هەرێمی کوردستان 120 ملیار دینار داهاتی نانەوتی بۆ مانگی شەش ڕادەستی بەغدا بکات، هەرچەندە لە بەغداوە ئاستەنگ بۆ جێبەجێکردنی ڕێککەوتنەکە دروستکراوە، بەڵام ئێستا پێشهاتی نوێ هەیە و پێشبینی دەکرێت لەم چەند ڕۆژەدا گفتوگۆکان ئەنجامیان هەبێت، هەرێمی کوردستان داهاتی ناوخۆی ئامادەیە و لە ئەگەری گەیشتنە ڕێککەوتن داهاتەکە ڕادەستی بەغدا دەکرێت.

لێدوانی فەرمی: سەرچاوەیەک لە وەزارەتی دارایی و ئابووری هەرێمی کوردستان بە ئاڤای ڕاگەیاند، "داهاتی نانەوتی ئامادەیە، دوای کۆبوونەوەکانی شاندەکانی نێوان هەولێر و بەغدا ئەگەر گەیشتنە خاڵێکی ئەرێنی ئەوا داهاتەکە بۆ مانگی شەش دەخرێتە سەر هەژماری بانکی وەزارەتی دارایی عێراق."

ئەمەش بزانە: ئاڤا زانیویەتی، کۆبوونەوەکانی دوێنێی شاندی هەرێمی کوردستان لەگەڵ هاوتاکانیان لە بەغدا، قۆناغێکی باشیان بڕیوە و ئومێدێکی باش بۆ گەیشتن بە ڕێککەوتن لەنێوان هەردوولا دروست بووە.