ئێران: ئامادەین بۆ کڕینی ئاو لە هەر وڵاتێک بۆ ڕووبەڕووبوونەوەی وشکەساڵی

ئاڤا نیوز

حکومەتی ئێران ڕایدەگەیێنێت، بەهۆی شەپۆلێکی وشکەساڵی فراوان کە وڵاتەکەی گرتووەتەوە، نیازی وایە ئاو لە وڵاتانی دراوسێ بکڕێت.

ئەوەی پێویستە بیزانیت: زۆربەی وڵاتانی دراوسێی ئێران بەدەست وشکەساڵی و کەمیی ئاوەوە دەناڵێنن، لەوانە عێراق، ئەفغانستان و ناوچە سنوورییەکانی پاکستان. تەنیا ئەرمینیا لە باکوور، بڕێکی زیاتری ئاوی هەیە.

لێدوانی فەرمی: عەباس عەلی ئابادی، وەزیری وزەی ئێران، ڕایگەیاند: "ئەگەر هەر وڵاتێک ئامادەبێت ئاو بفرۆشێت، ئەوا ئێمە دەیکڕین". هەروەها، بەپێی ئاژانسی هەواڵی ئەڵمانیا (dpa)، ئێران پرسی "هاوردەکردنی ئەو بەرهەمانەی کە بڕێکی زۆر ئاو بەکاردەهێنن" خستووەتە پڕۆژەی کارەکانییەوە.

پێدراوە ڕاستەکان: ئێران یەکێکە لە وشکترین وڵاتانی جیهان، شارەزایان لە ساڵانی ڕابردوودا بە شێوەیەکی بەرچاو کەمبوونەوەی ڕێژەی بارانبارین و زیادبوونی شەپۆلەکانی وشکەساڵی و دیاردە کەشوهەوا تووندەکانی دیکەیان تێبینی کردووە.