لێخۆشبوونی دارایی بۆ هاووڵاتیانی سووری دەردەکرێت

ئاڤا نیوز

سەرۆکوەزیران مەسرور بارزانی لێخۆشبوونی دارایی بۆ هاووڵاتیانی سووری لە هەرێمی کوردستان دەردەکات، بەڕێوەبەری دیوانی وەزارەتی ناوخۆ لەوبارەیەوە دەڵێت 'دەبێت هاووڵاتیانی سووری لە ماوەی 60 ڕۆژدا ئیقامەکانیان نوێ بکەنەوە'.

لێدوانی فەرمی: د. هێمن میرانی، بەڕێوەبەری دیوانی وەزارەتی ناوخۆی حکومەتی هەرێمی کوردستان بە ئاڤا میدیای ڕاگەیاند: لە ڕۆژی 2025-06-21، بە فەرمانی سەرۆکوەزیران مەسرور بارزانی، بڕیاری لێخۆشبوونی دارایی بۆ ئەو هاووڵاتیە سووریانە دەرچووە، کە بەشێوەی فەرمی، یان نافەرمی، یان لە ڕێگەی فڕۆکەخانەوە هاتوونەتە نێو هەرێمی کوردستان و سزای داراییان لەسەرە.

بەڕێوەبەری دیوانی وەزارەتی ناوخۆ وتیشی: مۆڵەتی 60 ڕۆژ بە هاووڵاتیانی سووری دراوە کە بێن و نیشینگە 'ئیقامە'کانیان نوێ بکەنەوە، تا ڕۆژی 2025-08-21 بڕیاری لێخۆشبوونی دارایی بۆ هاووڵاتیانی سووری بەرکار دەبێت.

زانیاریی زیاتر: د. هێمن میرانی ئاماژەی بەوە کرد، هەر هاووڵاتیەی سووری بیەوێت لەم ماوەیەدا بە دەروازەی بیشخابوور بگەڕێتەوە سووریا، ئەوا ئێمە هۆکاری گواستنەوەی بۆ دابین دەکەین.