دادگای باڵا بڕیاری دا: پارێزبەندیی پەرلەمانتاران هەمیشەیی نییە و لێپرسینەوەی یاسایی چاوەڕێیان دەکات

ئاڤا نیوز

ئەنجوومەنی باڵای دادوەریی عێراق لە بڕیارێکی یەکلاکەرەوەدا ڕایدەگەیێنێت، پارێزبەندیی پەرلەمانتاران هەمیشەیی نییە و ڕەتکردنەوەی هەڵگرتنی پارێزبەندی لەسەر ئەندامێکی پەرلەمان لە ماوەی خولەکەیدا، بە مانای داخستنی یەکجارەکیی دۆسیەکە نایەت.

چیرۆکی سەرەکی: ڕۆژی پێنجشەممە 2025-8-7، ئەنجوومەنی باڵای دادوەریی عێراق کۆبوونەوەی ژمارە 11ـی خۆی بە سەرۆکایەتیی دادوەر فائق زێدان ئەنجامدا.

ئەوەی پێویستە بیزانیت: ئەم بڕیارە دوای گفتوگۆکردن لەسەر ماددەی (11/دووەم/4) لە یاسای هەموارکراوی سزادانی عێراقی هاتووە، کە پەیوەستە بە میکانیزمی وەرگرتنی ڕەزامەندی بۆ دادگاییکردن یان هەڵگرتنی پارێزبەندی لەسەر پەرلەمانتاران.

ڕاگەیێنراوی فەرمی: بەگوێرەی ڕاگەیێنراوی ئەنجوومەنەکە، دەکرێت ڕێکاری یاسایی پێویست بەرامبەر بە هەر پەرلەمانتارێک بگیرێتەبەر ڕاستەوخۆ دوای کۆتاییهاتنی ماوەی ئەندامێتییەکەی لە ئەنجوومەنی نوێنەران، بەهەر هۆکارێک بێت.

لەهەمان کاتدا: بەپێی بڕیارە نوێیەکە، هیچ دۆسیەیەکی یاسایی لە دژی پەرلەمانتاران بەهۆی پارێزبەندییەوە بۆ هەمیشە داناخرێت، بەڵکو تەنیا دوا دەخرێت تا دوای تەواوبوونی خولی پەرلەمانییان. هاوکات بڕیارەکە دڵنیایی دەدات کە هیچ کەسێک لە سەرووی یاساوە نییە و دۆسیەکان لە دژی بەرپرسان کراوە دەمێننەوە تا ئەو کاتەی دادگا بڕیاری کۆتاییان لەسەر دەدات.