سوودانی بڕیاری دابینکردنی تەواوی خزمەتگوزارییەکان بۆ زیارەتکارانی کەربەلا و نەجەف دەردەکات

ئاڤا نیوز

سەرۆکوەزیرانی عێراق، بڕیاری دا بە دابینکردنی تەواوی خزمەتگوزارییەکان بۆ زیارەتکارانی هەردوو پارێزگای کەربەلا و نەجەف و ئەو ڕێگایانەی بەرەو ئەو دوو پارێزگایە دەچن.

وێنە گەورەکە: ساڵانە بەبۆنەی چلەی ماتەمینی ئیمام حوسێن ملیۆنان زیارەتکاری عێراقی و بیانی سەردانی مەزارگەی ئیمام حوسێن لە شاری کەربەلا و مەزارگەی ئیمامی عەلی لە شاری نەجەف دەکەن، بۆ ئەو مەبەستەش سەرجەم دامودەزگا ئەمنی و خزمەتگوزارییەکانی عێراق بە تەواوی دەکەونە ئامادەباشییەوە.

ڕاگەیێنراوی فەرمی: نووسینگەی ڕاگەیاندنی سەرۆکوەزیران لە ڕاگەیەندراوێکدا بڵاوی کردەوە: محەممەد شیاع سوودانی سەرپەرشتیی کۆبوونەوەیەکی بۆ بەدواداچوونی پلانی خزمەتگوزاریی تایبەت بە زیارەتی چلەی ماتەمینی لە پارێزگای کەربەلا کرد، بەئامادەبوونی وەزیری کارەبا و پارێزگاری کەربەلا و ژمارەیەک لە بەرپرسانی فەرمانگە و دامەزراوە خزمەتگوزارییەکانی پارێزگاکە.

بەپێی ڕاگەیێنراوەکە،  سوودانی ستایشی هەوڵ و ماندووبوونی هەموو ئەو کەسانەی کردووە کە وێڕای بارودۆخی سەختی کەشوهەوا بۆ سەرخستنی زیارەتی چلەی ماتەمینی ئیمام حوسێن کاردەکەن.

سوودانی ئاماژەی بەوەش کردووە، حکومەت هەر لەدوای کۆتاییهاتنی زیارەتی ساڵی ڕابردووەوە دەستی بە پلانی دابینکردنی خزمەتگوزاری بۆ زیارەتی چلەی ئەمساڵ کردووە و ژمارەیەک پڕۆژەی گرنگی لە پارێزگاکەدا خستووەتەگەڕ.

ئەوەی پێویستە بیزانیت: چلەی ماتەمینی ئیمامی حوسێن دەکەوێتە ڕۆژی 20ـی سەفەری 1447ـی کۆچی، کە بۆ ئەمساڵ بەپێی هەندێک لێکدانەوەی فەلەکی ڕێککەوتی 12 یان 14ـی ئاب دەبێت.