فایلی خەڵک؛ دانیشتووانی گوندێکی سنووری گوێر قوتابخانەیان نییە

ئاڤا نیوز

دانیشتووانی گوندێکی سنووری گوێر تاوەکو ئێستا قوتابخانەیان نییە و گرفتی ڕێگاوبان و کەمئاویشیان هەیە. بەڕێوەبەری ناحیەی گوێڕ لەمبارەیەوە دەڵێت، "لە چەند ڕۆژی داهاتوو کێشەی کەمئاوی چارەسەر دەکەین".

وێنە گەورەکە: دانیشتووانی گوندی شەمامەلی سەر بە ناحیەی گوێڕی هەولێر كە 250 ماڵ و خێزان دەبن، گلەییان هەیە و دەڵێن، "قوتابخانەمان نییە و قوتابییەكانمان کاتژمێرێک ڕێگە دەبڕن بۆ خوێندن، شەقام و كۆڵانەكانی نێو گوندەكە خۆڵن و تاوەكو ئێستا قیرتاو نەكراون، گرفتی كەمئاویشمان هەیە".

زانیاریی پەیامنێر: هیشام سەعید، پەیامنێری ئاڤا بەدواداچوونی بۆ كێشەکانی گوندەکە کردووە، خەڵکەکە دەڵێن: قوتابخانەی ئامادەییمان نییە قوتابخانەیەك لە ساڵی 2014ەوە بەردی بناغەی دانراوە و تاوەكو ئێستا تەواو نەكراوە.

لێدوانی فەرمی: مەسعوود نووری، بەڕێوەبەری ناحیەی گوێڕ لەمبارەیەوە پێی ڕاگەیاندین: سەبارەت بە گرفتی ئاوەکە پەیوەندی بە کەمی کارەبای نیشتمانیەوە هەیە، هەوڵ دەدەین لە 10 بۆ 15 ڕۆژی داهاتوودا چارەسەری بکەین.

هەرچی سەبارەت بە شەقامە ناوخۆییەکانی گوندەکەیە، ئەم بابەتە ئیدارەی مووسڵ پێی هەڵدەستێت و یەک ملیار دیناری بۆ گوندی شەمامەل و خالند و ئەبو جەردە تەرخان کردووە، بڕیار دەرچووە و تەنیا ماوە پارەکە خەرج بکرێت.

مەسعوود نووری دەشڵێت، "قوتابخانە ئامادەییەکەش بەهۆی قەیرانی داراییەوە وەستاوە، چاوەڕێی هەبوونی بودجەی پێویست دەکەین، لەبەر ئەوەی هەموو ڕێکارە ئیدارییەکانی تەواو بووە".