کرێملین: بەمزووانە کۆبوونەوەی نێوان پووتین و ترەمپ ئەنجام دەدرێت

ئاڤا نیوز

کۆشکی کرێملین ڕایگەیاند، کۆبوونەوەی لووتکەی ئۆکراینا لە نێوان دۆناڵد ترەمپ و ڤلادیمێر پووتین، لە ڕۆژانی داهاتوو ئەنجام دەدرێت، بەڵام پووتین لە بنەڕەتدا ڕەتیکردووەتەوە سەرۆکی ئۆکراینا لە کۆبوونەوەکە ئامادە بێت.

وێنە گەورەکە: سەرۆکی ئەمریکا لە دوای دەستبەکاربوونییەوە هەوڵی کۆتاییهێنان بە هێرشە سەربازییەکانی ڕووسیا بۆ سەر ئۆکراینا دەدات، تاوەکو ئێستا سێ خولی دانوستانی ڕاستەوخۆی ڕووسیا و ئۆکراینا لە ئیستەنبووڵ ئەنجام دراوە بەڵام نەیتوانی هیچ پێشکەوتنێک بەرەو ئاگربەست بەدەست بهێنێت. 

ئەوەی پێویستە بیزانیت: دۆناڵد ترەمپ، ڕۆژی چوارشەممە ڕایگەیاندبوو، لەوانەیە زۆر بە زوویی چاوی بە پووتین بکەوێت، لە بەرامبەریشدا  یوری ئوشاکۆڤ، یاریدەدەری سەرۆکی ڕووسیا وتی، هەفتەی داهاتوو وەک وادەی ئامانج دانراوە، ئاماژەی بەوەشکرد، هەردوولا لە بنەڕەتدا ڕێککەوتوون لەسەر شوێنی کۆبوونەوەکە بەبێ ئەوەی ناوی بێنن، بەڵام دواتر واشنتن ڕەتیکردەوە کە شوێن یان وادەیەک دیاریکرابێت بۆ کۆبوونەوەکە.

ڕاگەیێنراوی فەرمی: کرێملین ڕایگەیاند، کە پووتین ئامادە نییە سەرۆکی ئۆکراینا لە کۆبوونەوەکە ئامادەبێت، هاوکات سەرۆکی ڕووسیا ئیماراتی یەکگرتووی عەرەبی وەک شوێنێکی ئەگەری بۆ ئەنجامدانی لوتکەکە ناوبرد، بەڵام ئەمە لەلایەن واشنتنەوە پشتڕاست نەکراوەتەوە.

لەلایەکی دیکەوە: ڤۆلۆدیمیر زێلێنسکی، سەرۆکی ئۆکراینا پێداگری لەسەر ئەوە دەکات کە دەبێت لە هەر گفتوگۆیەکدا ئەویش بەشدار بێت.