کارەبای پڕۆژەی ڕووناکی دەگاتە چوار گەڕەکی سۆران

ئاڤا نیوز

ڕێکارەکانی گەیاندنی کارەبای پڕۆژەی ڕووناکی بۆ چوار گەڕەکی سەنتەری سۆران دەستیپێکرد، لە ڕۆژی شەممەوە کارە تەکنیکییەکان دەستپێدەکەن.

وێنە گەورەکە: پڕۆژەی ڕووناکی، یەکێکە لە پڕۆژە ستراتیژییەکانی کابینەی نۆیەمی حکومەتی هەرێمی کوردستان، بەرنامە ئەوەیە تا کۆتایی ساڵی 2026 هەموو شارەکانی هەرێمی کوردستان ببنە خاوەنی کارەبای 24 کاتژمێری.

لێدوانی فەرمی: ئەردەوان ئیبراهیم، بەڕێوەبەری گشتی کارەبای سۆران بە ئاڤا میدیای ڕاگەیاند، دوو ڕۆژە تیمەکانی پڕۆژەی ڕووناکی لە هەریەکە لە گەڕەکەکانی (ئاوارە، دیلان، قەندیل و وەستا ڕەجەب) ڕێنمایی خۆ تۆمارکردن دەدەن بە ماڵەکان، ڕۆژی شەممە تیمە تەکنیکییەکان لەو چوار گەڕەکە کارەکانیان دەستپێدەکەن. بۆ ماوەی دوو ڕۆژ کارەبای نیشتمانی نابێ و لەو کاتانە مۆلیدە هەڵدەکرێت، داوا لە هاونیشتمانیان دەکرێت هاوکاربن.

زانیاریی زیاتر: بە گوتەی ئەردەوان ئیبراهیم، بەرنامەکە ئەوەیە تا کۆتایی ئەم مانگە هەموو سەنتەری سۆران کارەبای ببێتە 24 کاتژمێری. لە کۆتایی مانگی 10 کارەبای پڕۆژەی ڕووناکی دەگاتە هەموو ئیدارەی سەربەخۆی سۆران بە قەزا و ناحیەی و گوندەکانەوە.

بۆچی گرنگە: لە ئیدارەی سەربەخۆی سۆران 116 مۆلیدە ڕۆژانە کار دەکەن، بە گەیشتنی تەواوەتی کارەبای 24 کاتژمێری ئەو ژمارەیە لە مۆلیدە دەکوژێنەوە، بەمەش ژینگەی ناوچەکە زیاتر پاک دەبێتەوە.

ژمارەکان وادەڵێن: دوایین داتای تیمی پڕۆژەی ڕووناکی ئەوەیە، تا ئێستا کارەبای 24 کاتژمێری بۆ دوو ملیۆن و 700 هەزار کەس دابینکراوە. هاوکات کارەبای بەردەوام گەیشتووەتە زیاتر لە 100 هەزار شوێنی بازرگانی. دوو هەزار و 500 مۆلیدەش کوژێنراونەتەوە.