سێ ڕۆژە ئاگرەکەی سیدەکان کۆنترۆل نەکراوە

ئاڤا نیوز

ماوی سێ ڕۆژە ئاگرێکی گەورە لە سنووری قەزای سیدەکان کەوتووەتەوە و تا ئێستا نەتوانراوە کۆنترۆل بکرێت. بەرگریی شارستانیی سۆران دەڵێت، بەهۆی بوونی کێڵگەی مین و پاشماوەی جەنگی گرفت بۆ تیمەکان دروست بووە.

چیرۆکی سەرەکی: ماوەی سێ ڕۆژە ئاگر لە پوش و پاوان و دارستانی کوپی هاجەر و دۆڵی شیوەن لە سنووری قەزای سیدەکان کەوتووەتەوە، هەرچەند تیمەکانی بەرگریی شارستانی بەهاوکاری خەڵکی سنوورەکە لە هەوڵدان، بەڵام تا ئێستا ئاگرەکە بە تەواوی کۆنترۆل نەکراوە.

لێدوانی فەرمی: ڕەوەند هاودیانی، وتەبێژی بەرگریی شارستانیی سۆران بە ئاڤای گوت: سەختی شوێنی ئاگرەکە و بوونی کێڵگەی مین و پاشماوەی جەنگی لەو سنوورە، گرفتی بۆ تیمەکانمان دروست کردووە لە کۆنترۆل کردنی ئاگرەکە.

- لە چەند شوێنێک ئاگرەکەمان کۆنترۆل کردووە، بەڵام جارێکی دیکە ئاگر لەو شوێنانەی مین و تەقەمەنی هەیە جارێکی دیکە ئاگر تەشەنەی کردووەتەوە.

ئەوەی پێویستە بیزانیت: ئەمساڵ 167 ئاگر لە پووش و پاوان و دارستانی سنووری ئیدارەی سەربەخۆی سۆران کەوتوونەتەوە، بەهۆیەوە زیاتر لە 500 دۆنم سووتاوە و زیانی زۆری بە ژینگەی سنوورەکە گەیاندووە.