کۆمیسیۆن 68 کاندیدی دیکەی دوورخستەوە

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق، لە هەنگاوێکی نوێدا، 68 کاندیدی دیکەی لە کێبڕکێی هەڵبژاردنی پەرلەمان دوورخستەوە.

وێنە گەورەکە: بڕیارە لە 11ـی تشرینی دووەمی 2025 هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، لە چوارچێوەی ڕێکارەکانی بەر لە هەڵبژاردن، کۆمیسیۆن ژمارەیەک کاندید بەهۆکاری جیا لە کێبڕکێیەکە دوور دەخاتەوە.

بەڵگەنامەی فەرمی: بەگوێرەی ئەو بەڵگەنامەی دەست ئاڤا میدیا کەوتووە، کۆمیسیۆن ناوی 68 کاندیدی دوورخراوەی بڵاوکردووەتەوە کە دوو سیاسەتمەداری دیاری سوننە، ئەحمەد جبووری (ئەبوو مازن) و نەجم جبووری، لەنێو دوورخراوەکاندان.

هۆکارە زانراوەکان: هەر بەگوێرەی بەڵگەنامەکە هۆکاری دوورخستنەوەیان بوونی "پێشینەی تاوانکارییە". تۆمەتەکانیش بریتین لە "کوشتن، بەرتیل، ساختەکاری، فێڵکردن، لەگەڵ دۆسیەی گەندەڵیی دارایی و کارگێڕی".

ئەوەی پێویستە بیزانیت: پێشتریش کۆمیسیۆن 46 کاندیدی دیکەی بەهۆی ئەوەی حیزبەکانیان مەرجەکانی وەرگرتنی کاندیدەکانیان لەنێو لیستی هەڵبژاردن لەدەست داوە، دوورخستبووەوە.