کۆمیسیۆن 88 کاندید لە کێبڕکێی هەڵبژاردن دووردەخاتەوە

ئاڤا نیوز

دوێنێ و ئەمڕۆ کۆمیسیۆنی هەڵبژاردنەکانی عێراق بە دوو بڕیار 88 کاندیدی لە کێبەرکێی هەڵبژاردنی پەرلەمانی عێراق دوورخستەوە کە پێشتر لەلایەن دادگاوە لەسەر دۆسییەی جیاواز حکومدراون، وتەبێژی کۆمیسیۆنیش ڕایگەیاند، بڕیارەکە دەکرێت تانەی لێبدرێت و کۆتا بڕیاریش دەستەی دادوەری هەڵبژاردن لەسەر ئەو کاندیدانە دەریدەکات. 

وێنە گەورەکە: بڕیارە لە 11ـی تشرینی دووەمی 2025 هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، لە چوارچێوەی ڕێکارەکانی بەر لە هەڵبژاردن، کۆمیسیۆن ژمارەیەک کاندید بەهۆکاری جیا لە کێبەرکێکە دوور دەخاتەوە.

لێدوانی فەرمی: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤا میدیای ڕاگەیاند، ئەوانەی دوورخراونەتەوە پاڵپشت بە یاسا بووە و پەیوەست بووە بە مەرجی شیاوی بۆ کاندیدبوون لەوانەش ڕەوشتی باش، حکوم نەدراو بە تاوان یان هەر شتێکی دیکە کە پەیوەندی بە شەرفەوە هەبێت، لەگەڵ تاوانبار بە گەندەڵی کارگێریی و دارایی دوای ئەوەی دۆسییەکەی بڕیاری کۆتایی لە دادگا وەرگرتووە، بڕیاری دوورخستنەوەکە تەنانەت ئەوانەش دەگرێتەوە کە بە یاسای لێبوردنی گشتیی ئازادکراون، واتە یاسای لێبووردنی گشتی نابێتەهۆی ئەوەی دەرفەت بەو کەسانە بدرێت بەشداری هەڵبژاردن بکەن و کاندیدبن.

ئاماژەی بەوەشکرد، بڕیاری دوورخستنەوەی ئەو کاندیدانە پەیوەندی بە ڕاپۆرتەکانی وەزارەتی ناوخۆ و لایەنە پەیوەندیدارەکانەوە هەبووە و بەبڕیاری ئەنجوومەنی کۆمسیاران دوورخراونەتەوە، بەڵام بڕیارەکە دوای سێ ڕۆژ لە بڵاوکردنەوەی دەکرێت لەبەردەم دەستەی دادوەری هەڵبژاردن تانەی لێبدرێت، بڕیاری دەستەکەش بۆ هەمووان پابەندکار دەبێت.

ژمارەکان وادەڵێن: زۆرترین کاندیدی دووخراوە لە پارێزگای بەغدا بوون کە 18 کاندیدن، لە نەینەواش 15 کاندید، لە زیقار نۆ کاندید، لە بابل نۆ کاندید، لە دیوانییە حەوت کاندید، لە بەسڕە چوار کاندید، لە کەرکووک دوو کاندید، لە سەڵاحەددین چوار کاندید، لە دیالە چوار کاندید، لە ئەنبار سێ کاندید، لە نەجەف سێ کاندید و لە میسانیش دوو کاندید دوورخراونەتەوە.