هۆشیار زێباری: بڕانی کارەبا لە عێراق سەرکەوتنی پڕۆژەی ڕووناکی دەردەخات

ئاڤا نیوز

ئەندامێکی دەستەی کارگێڕیی مەکتەبی سیاسیی پارتی دەڵێت، کوژانەوەی تەواوەتی کارەبا لە هەموو پارێزگاکانی عێراق جگە لە هەرێمی کوردستان لەم گەرمایە تاقەتپڕوکێنەدا، نیشانەی سەرکەوتنی "پڕۆژەی ڕووناکی"ی حکومەتی هەرێمی کوردستانە بۆ دابینکردنی کارەبای بەردەوام، لەکاتێکدا کوردستان شایستە داراییەکانی خۆیشی لەلایەن بەغداوە پێنەدراوە.

چیرۆکی سەرەکی: ئەمڕۆ دوشەممە 11-8-2025، لەکاتژمێر سێی پاشنیوەڕۆوە لە بەغدای پایتەخت و سەرجەم پارێزگاکانی دیکەی عێراق جگە لە هەرێمی کوردستان، کارەبای نیشتمانی تووشی کوژانەوەی گشتیی 'شەت داون' بووەوە، وەزارەتی کارەبای فیدراڵیش ئاشکرایکرد کە بەهۆی زیارەتی ملیۆنی بۆ چلەی ئیمامی حوسێن فشارێکی زۆر کەوتووەتەسەر هێڵەکانی کارەبا و ئەوەش هۆکاری لەناکاوی پچڕانی شەش هەزار مێگاوات کارەبا بووە.

ڕاگەیێنراوی فەرمی: هۆشیار زێباری، ئەندامی دەستەی کارگێڕیی مەکتەبی سیاسیی پارتی دیموکراتی کوردستان، لە هەژماری خۆی لە تۆڕی کۆمەڵایەتیی ئێکس ئاماژەی بەوەکردووە، کوژانەوەی کارەبا لە پارێزگاکانی عێراق جگە لە هەرێمی کوردستان لەم پلە بەرزەی گەرمادا، ئاماژەیەکی نوێیە لەسەر سەرکەوتنی حکومەتی هەرێمی کوردستان بۆ دابینکردنی کارەبا بۆ هاووڵاتیان لەڕێگەی پڕۆژەی ڕووناکییەوە.

ئاماژەی بەوەشکردووە، ئەم سەرکەوتنەی کوردستان هاوکاتە لەگەڵ بڕینی شایستە داراییەکانی، سەرەڕای ئەوەش حکومەتی کوردستان خواستی خۆی بۆ یارمەتیدانی حکومەتی فیدراڵ لە چارەسەری کێشەی کارەبادا ڕاگەیاندووە.