چەند میکانیزمێک بۆ دابەشکردنی زەوی لە ئیدارەی سۆران کاری لەسەر دەکرێت

ئاڤا نیوز

بۆ دابەشکردنی زەوی بەسەر فەرمانبەران لە سنووری ئیدارەی سەربەخۆی سۆران کار لەسەر چەند میکانیزمێک دەکرێت، بۆ ئەوەی زەوییەکان ئامادە بکرێن.

وێنە گەورەکە: هەنگاوەکانی دابەشکردنی زەوی بەسەر فەرمانبەران بەردەوامە و تا ئێستا ڕەزامەندی پێدانی زەوی بە نزیکەی 485 هەزار فەرمانبەر و خانەنشین و پێشمەرگە دراوە، لە سنووری هەندێک شارەوانیش دابەشکردنی زەوی دەستی پێکردووە.

ئەوەی پێویستە بیزانیت: لە سنووری ئیدارەی سەربەخۆی سۆران تا ئێستا ڕەزامەندی پێدانی زەوی بۆ زیاتر لە 36 هەزار کەس گەڕاوەتەوە، بەڵام تەنیا هەشت هەزار پارچە زەوی ئامادە کراوە، بۆیە پرۆسەی دابەشکردنی زەوی لەو سنوورە دوادەکەوێت.

لێدوانی فەرمی: خەسرەو ئیسماعیل، بەڕێوەبەری گشتیی شارەوانییەکانی سۆران بە ئاڤای گوت: کار لەسەر چەند میکانیزمێک دەکەین بۆ ئامادەکردنی زەویی پێویست بۆ دابەشکردنی بەسەر فەرمانبەران ئەوانیش بریتین لە:

یەکەم: چەند نەخشەیەکی کەرتی پێشنیازکراون بۆ ئەوەی سنووری شارەوانییەکان فراوان بکەین.

دووەم: ئەگەر چارەسەری یەکەم جێبەجێ نەکرا، بە هەماهەنگی ئیدارەی سەربەخۆی سۆران و وەزارەتی شارەوانی کار لەسەر ئەوە دەکەین، لە شوێنی دیکە زەوی بە فەرمانبەران بدرێت.

گرفتە سەرەکییەکە: هەڵکەوتەی سنووری ئیدارەی سەربەخۆی سۆران شاخاوییە و دەشتایی کەمە، ئەمەش لایەنە پەیوەندیدارەکانی ڕووبەری ئاستەنگ کردووە لە دابینکردنی زەوی بۆ ئەوەی بەسەر فەرمانبەران دابەش بکرێت.

ئەمەش بزانە: ئیدارەی سەربەخۆی سۆران لە 6 قەزا و 13 ناحیە پێکهاتووە.