بڕیارێکی نوێ لە بەرژەوەندیی شۆفێران دەردەکرێت

ئاڤا نیوز


فەرمانگەی سەرپەرشتیاریی دادوەری نووسراوێکی دەرکردووە لەبارەی ئەو ئۆتۆمبێلانەی تووشی ڕووداوی هاتووچۆ دەبن، بۆ ئەوەی چیتر لە بنکەکانی پۆلیسی هاتووچۆ ڕانەگیرێن و دوای پشکنین و هێڵکاری یەکسەر بە خاوەنەکانیان بدرێنەوە.

 

نووسراوی فەرمی: فەرمانگەی سەرپەرشتیاریی دادوەریی هەولێر نووسراوەکەی ئاراستەی گشت دادگاکانی لێکۆڵینەوە لە هەولێر و دهۆک کردووە.

تێیدا ڕوونکراوەتەوە بەپێی ماددەی 21 لە بڕگەی دووەم لە یاسای سەرپەرشتیاری دادی ژمارە 124ـی ساڵی 1979، دادوەران دەسەڵاتیان هەیە بەپێی هەردوو ماددەی 23 و 24 لە یاسای هاتووچۆ، دوای پشکنین و هێڵکاری شوێنی ڕووداو و پشکنینی ئامێرسازی بۆ ئۆتۆمبێلەکان، ڕاستەوخۆ ئۆتۆمبێلەکان ڕادەستی خاوەنەکانیان بکرێنەوە.

هۆکارە زانراوەکان: هۆکاری دەرچوونی ئەم بڕیار بۆ ئەوە دەگەڕێتەوە، تێبینی کراوە هێشتنەوەی ئۆتۆمبێلەکان لەلایەن بەشێک لە دادوەرانی لێکۆكینەوە زیان بە ئۆتۆمبێلەکان و خاوەنەکانیان دەگەیێنێت.

قووڵتر: پێشتر تاوەکو لەڕووی یاسایی یان کۆمەڵایەتییەوە کێشەی ئەو شۆفێرانەی تووشی ڕووداوی هاتووچۆ بوونە چارەسەر نەکرابووایە، ئۆتۆمبێلەکان بە خاوەنەکانیان نەدەدرایەوە، بڕیارەکەی ئێستاش ئارەزوومەندانەیەوە و ئەو خاوەن ئۆتۆمبێلەی سەرپێچیکار نییە، دەتوانێت ئۆتۆمبێلەکەی لای پۆلیس بهێڵێتەوە تاوەکو کەیسەکە یەکلایی دەکرێتەوە و دادگا بڕیاری قەرەبووکردنەوەی بۆ دەردەکات.


بۆچی گرنگە: ئێستا سەدان ئۆتۆمبێل لە بنکەکانی پۆلیسی هاتووچۆ ڕاگیراون تاوەکو کەیسەکانیان یەکلا دەبێتەوە، دوای ئەم بڕیارە خاوەنەکانیان دەتوانن وەریان بگرنەوە، لەمەودواش پێویست ناکات هیچ ئۆتۆمبێلێک لای پۆلیس بهێڵدرێتەوە.