شاسوار عەبدولواحید بەتۆمەتی هەڕەشەکردن و ناوزڕاندن دەستگیر کراوە

ئاڤا نیوز

بەپێی نووسراوێکی دادگا، شاسوار عەبدولواحید، سەرۆکی جوڵانەوەی نەوەی نوێ بە ماددە 431 لە یاسای سزادانی عێراقی دەستگیر کراوە کە لەسەر سکاڵای ئەندامێکی پێشووی پەرلەمانی کورستان بە تۆمەتی هەڕەشە و ناوزڕاندن بووە.

چیرۆکی سەرەکی: شەوی ڕابردوو، شاسوار عەبدولواحید لە ماڵەکەی خۆی لە گوندی ئەڵمانی لە شاری سلێمانی، لەسەر ئەو سکاڵایانەی لەسەری تۆمارکرابوون، لەلایەن هێزێکی ئەمنییەوە دەستگیر کرا.

نووسراوی فەرمی: بەپێی نووسراوی فەرمانی گرتنی دادگای کەتنی 2ی سلێمانی کە لە 4-8-2025، ئاراستەی بەڕێوەبەرایەتیی پۆلیسی پارێزگای سلێمانی کراوە، بەپێی ماددەی 431 لە یاسای سزادانی عێراقی فەرمانی دەستگیرکردن بۆ شاسوار عەبدولواحید دەرچووە.

لەلایەکی دیکەوە: بەپێی نووسراوێکی دادگا کە لە 3-8-2025 دەرچووە و کۆپییەکی دەست ئاڤامیدیا کەوتووە، دادگای سلێمانی بڕیاریداوە بە سزادانی تۆمەتبار شاسوار عەبدولواحید بە سزای بەندکردن بۆ ماوەی شەش مانگ.

زانیاریی زیاتر: شاسوار عەبدولواحید لەسەر سکاڵای شادی نەوزاد، ئەندامی پێشووی پەرلەمانی کورستان دەستگیر کراوە، بە تۆمەتی هەڕەشە و ناوزڕاندن.


ئەوەی پێویستە بیزانیت: ناوەرۆکی ماددە 431 لە یاسای سزادانی عێراق بەمجۆرەیە:

"هەر کەسێک هەستێت بە هەڕەشەکردن لە یەکێک بەوەی تاوانێک دژی کەسێک یان سامانی کەسەکە ئەنجام بدات یان هەڕەشەی تۆمەت خستنەپاڵی بکات بەشتێکی ئابڕووبەر، شکاندنی پێگە یان درکاندنی (نهێنی کەسەکە)، کەسی تۆمەتبار بە زیندانییکردن سزا دەدرێت".