هۆشدارییەک لە ئەنجوومەنی باڵای دادوەرییەوە بۆ کاندیدان

ئاڤا نیوز

لەگەڵ نزیکبوونەوەی وادەی هەڵبژاردنی ئەنجوومەنی نوێنەران، ئەنجوومەنی باڵای دادوەریی عێراق هۆشدارییەکی تووند ئاڕاستەی سەرجەم کاندیدەکان دەکات و جەخت دەکاتەوە کە هەر کاندیدێک گوتاری دووبەرەکی و سووکایەتیکردن بە ڕکابەرەکانی بکات، ڕووبەڕووی لێپرسینەوەی یاسایی و ئەگەری دوورخستنەوە لە پرۆسەکە دەبێتەوە.

وێنە گەورەکە: بڕیارە لە 11ـی تشرینی دووەمی 2025 هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، لە چوارچێوەی ڕێکارەکانی بەر لە هەڵبژاردن، کۆمیسیۆن تاوەکو ئێستا ژمارەیەک کاندیدی بەهۆکاری جیا لە کێبڕکێکە دوورخستووەتەوە.

ڕاگەیێنراوی فەرمی: بەگوێرەی ڕاگەیێنراوی ئەنجوومەنەکە "لەم دواییانەدا تێبینی کراوە کە هەندێک لە کاندیدەکان لە چالاکی و کۆبوونەوەکانی بانگەشەدا، زمانێک بەکاردەهێنن کە لە ڕووی یاساییەوە قبوڵکراو نییە. ئەم زمانە هاندەرە بۆ دروستکردنی دووبەرەکی لەنێوان ڕۆڵەکانی یەک نیشتماندا، یان سووکایەتی بە بەربژێرەکانی دیکە دەکات لە دەرەوەی چوارچێوەی کێبڕکێی هەڵبژاردن، جا بە مەبەست بێت یان بەبێ مەبەست."

لەهەمان کاتدا: ئەنجوومەنەکە جەختی لەوە کردەوە کە "ئەم جۆرە ڕەفتارە پێچەوانەی دەستوور و یاسا و ڕێنماییە کارپێکراوەکانە، ئاماژەیە بۆ ئەگەری بێبەشکردنیان لە بەشداریکردن لە هەڵبژاردنەکاندا بەپێی یاسا."

زانیاریی زیاتر: ئەنجوومەنی باڵای دادوەری داوا لە هەموو کاندیدەکان دەکات، چ بە شێوەی تاک یان حزب، کە خۆیان لەم جۆرە وتار و لێدوانانە بەدوور بگرن و ڕایگەیاندووە کە بە وردی چاودێریی هەموو لێدوانەکان دەکرێت و ڕێکاری یاسایی بەرامبەر هەر کەسێک دەگیرێتەبەر کە پابەند نەبێت.