ڕووفاتی 22 کوردی ئێزدی گەڕێنرانەوە بۆ شنگال

ئاڤا نیوز

وەزارەتی تەندروستی عێراق ڕایدەگەیێنێت، ڕووفاتی 22 کەس لە قوربانییانی کوردی ئێزدی کە لە کاتی دەستبەسەرداگرتنی پارێزگای نەینەوا لەلایەن ڕێکخراوی داعشەوە کوژراون، گەڕێنراونەتەوە بۆ کەسوکاریان.

وێنە گەورەکە: کەسوکاری قوربانیان لە شنگال ماوەی زیاتر لە شەش ساڵە چاوەڕێی ئەنجامی پشکنینی بۆماوەیی رووفاتەکانن ئەوانەی لە گۆڕە بەکۆمەڵەکان دەرهێنراون، پرۆسەکە لەلایەن حکومەتی عێراقەوە بە خاوی بەڕێوەدەچێت و ناوە ناوە ژمارەیەک لە ڕووفاتەکان دوای ئاشکراکردنی ناسنامەکانیان ڕادەستی کەسوکاریان دەکرێنەوە.

ڕاگەیێنراوی فەرمی: بەگوێرەی ڕاگەیێنراوی وەزارەتی تەندروستیی عێراق، "بەڕێوەبەرایەتیی پزیشکی دادوەری ڕووفاتی 22 کوردی ئێزدی کە لە کاتی دەستبەسەرداگرتنی پارێزگای نەینەوا لەلایەن باندە تیرۆریستییەکانەوە کوژرابوون، گەڕاندووەتەوە بۆ کەسوکاریان."

وەزارەتەکە ڕوونیکردووەتەوە کە ئەمە هەشتەمین گرووپە، بەمەش ژمارەی ئەو کەیسانەی کە ناسراونەتەوە و گەڕێنراونەتەوە بۆ کەسوکاریان گەیشتووەتە (297) ڕووفات.

شێوازی جێبەجێکردن: پڕۆسەی ڕادەستکردنەوەکە لە شوێنی نیشتەجێبوونی کەسوکاری قوربانییەکان لە پارێزگای نەینەوا - قەزای شنگال، بە هاوکاری و هەماهەنگی لەگەڵ لیژنەی نێودەوڵەتیی کاروباری بێسەروشوێنەکان و هەڵمەتی نادیا موراد، لە میانی ڕێوڕەسمێکی "تایبەت"ـی ڕادەستکردنەوە و پرسەداناندا بەڕێوەچووە.

وەزارەتەکە جەختی لەوە کردووەتەوە کە "بەردەوام دەبێت لە بەکارهێنانی هەموو هەوڵ و تواناکانی بەردەست لەلایەن بەڕێوەبەرایەتیی پزیشکی دادوەریەوە تاوەکو ئەم دۆسیەیە بە تەواوی دابخرێت و هەموو ڕووفاتەکان بدرێنەوە بە کەسوکاریان."

باکگراوند: لە 20214-08-03 لەکاتی هێرشی داعش بۆسەر باشووری کوردستان، بەشێکی زۆری گوندنشینانی گوندی كۆجۆ لەلایەن چەکدارانی ڕێکخراوی داعشەوە کۆمەڵکوژکران. لە هێرشەکەی داعشدا نزیکەی 520 پیاو و 510 ژن کوژران و بێسەروشوێن کران.