هەفتەی داهاتوو چارەنووسسازە؛ سوودانی بڕیار لە ناردنی مووچە دەدات

ئاڤا نیوز

چاوەڕوان دەکرێت هەفتەی داهاتوو ببێتە هەفتەیەکی یەکلاکەرەوە بۆ پرسی مووچەی فەرمانبەرانی هەرێمی کوردستان، ئەمەش دوای ئەوەی هەولێر و بەغدا گەیشتوونەتە ڕێککەوتن لەسەر دەستپێکردنەوەی هەناردەی نەوتی کوردستان و بڕیارە ئەنجوومەنی وەزیرانی عێراق لە کۆبوونەوەی هەفتەی داهاتوودا بڕیاری ناردنی مووچەی مانگی شەش بدات. 

چیرۆکی سەرەکی: بەپێی ئەو ڕێککەوتنە نوێیەی کە لەنێوان شاندی هەرێمی کوردستان و وەزارەتی نەوتی عێراق واژۆ کراوە، بڕیارە هەفتەی داهاتوو هەناردەکردنەوەی نەوتی هەرێمی کوردستان لە ڕێگەی بەندەری جەیهانی تورکیاوە دەست پێبکاتەوە. سەرجەم کێشە و ئاستەنگە هونەری و تەکنیکییەکانی بەردەم پرۆسەکە چارەسەر کراون و تەنیا چاوەڕێی بڕیار دەکات.

ژمارەکان وادەڵێن: هەرێمی کوردستان ئاستی بەرهەمهێنانی نەوتی گەیاندووەتە 160 هەزار بەرمیل لە ڕۆژێکدا. بەپێی ڕێککەوتنەکە، هەولێر 110 هەزار بەرمیل ڕادەستی کۆمپانیای سۆمۆ دەکات و 50 هەزار بەرمیلیشی بۆ پێداویستی ناوخۆیی بەکاردەهێنێت. بۆ ئەم مەبەستەش هەژمارێکی بانکی تایبەت کراوەتەوە کە داهاتی نەوتەکە ڕاستەوخۆ دەچێتە سەری و لەژێر چاودێری وەزارەتی نەوتی عێراقدا دەبێت بۆ مامەڵەکردن لەگەڵ کۆمپانیاکانی نەوت.

بەتەنیشت ئەم بابەتەوە: سەرۆکوەزیرانی عێراق، محەمەد شیاع سوودانی، دەستپێکردنەوەی هەناردەی نەوتی بە مەرجی سەرەکی و بنەڕەتی دادەنا بۆ ناردنی مووچەی کوردستان، کە ئێستا ئەو بەربەستە لابراوە. هاوکات چاوەڕوان دەکرێت هەرێمی کوردستان لە هەفتەی داهاتوودا بڕی 120 ملیار دینار لە داهاتی ناوخۆ ڕەوانەی بەغدا بکات. 

ناردنی داهاتی ناوخۆ و دەستپێکردنەوەی هەناردەی نەوت وا دەکات کە ئەگەر هیچ کێشەیەکی لەناکاو دروست نەبێت، ئەنجوومەنی وەزیرانی عێراق بڕیاری ناردنی مووچە بدات. 

ئەوەی پێویستە بیزانیت: ڕێککەوتنی نەوتی نێوان هەولێر و بەغدا درێژخایەنە، بەڵام گفتوگۆکان لەسەر میکانیزمی داهاتە نانەوتییەکان، داهاتی ناوخۆ هێشتا بەردەوامە و لیژنەیەکی تەکنیکیی هەولێر بۆ ئەم مەبەستە لە بەغدا ماوەتەوە تا گەیشتن بە ڕێککەوتنی کۆتایی.