گرفتی كەمئاویی ئاكرێ چارەسەر دەكرێت

ئاڤا نیوز

لە ڕێگەی جێبەجێكردنی پڕۆژەی ستراتیژیی ئاوی ئاكرێ، گرفتی كەمئاویی دانیشتووانی ئەو قەزایە و دەوروبەری چارەسەر دەكرێت و بەڕێوەبەری گشتیی ئاوی هەرێمی كوردستانیش دەڵێت تاوەكو كۆتایی ساڵی 2026 پرۆژەکە تەواو دەبێت.

وێنە گەورەكە: لە چوارچێوەی ستراتیژییەتی کابینەی نۆیەمی حکومەتی هەرێمی کوردستان بۆ کەمکردنەوەی کاریگەرییەکانی گۆڕانی کەشوهەوا و پاراستنی ئاوی ژێر زەوی، چەند پرۆژەیەکی ستراتیژیی ئاو لە هەرێمی کوردستان جێبەجێ كراون و ژمارەیەك پڕۆژەی دیکەش لە ناوچە جیاوازەکان لە جێبەجێكردندان، پرۆژەی ستراتیژیی ئاوی ئاکرێش یەكێكە لەو پڕۆژانە كە كۆتایی بە گرفتی كەمئاویی ناوچەكە دەهێنێت.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی كوردستان بە ئاڤای ڕاگەیاند: ئەگەر هیچ گرفتێکی دارایی بۆ دروست نەبێت، پرۆژەی ستراتیژیی ئاوی ئاکرێ، کۆتایی ساڵی 2026 تەواو دەبێت و کێشەی کەمئاوی ناوچەکە چارەسەر دەکات.

ئاری ئەحمەد ئەمانەشی وت:

٠ 109 ملیار و دوو ملیۆن دینار لە بودجەی وەبەرهێنانی وەزارەتی شارەوانی بۆ پرۆژەی ئاوی ئاکرێ، لەلایەن حکومەتی هەرێمی کوردستانەوە دابین کراوە، سەرباری ئەو کێشە ئابوورییانەی حکومەتی فیدراڵ ڕووبەڕووی هەرێمی کوردستانی دەکاتەوە.

٠ پرۆژەی ئاوی ئاکرێ توانای پاڵاوتنی سێ هەزار مەتر سێجا ئاوی لە کاتژمێرێکدا هەیە و سەرچاوەکەشی ئاوی قەندیلە، بە تەوابوونی 200 هەزار هاووڵاتی سنووری 18 گوند و ناحیەی بجیل لێی سوودمەند دەبن.