پرۆژەی ڕووناكی 310 موەلیدەی سەنتەری شاری دهۆكی كوژاندووەتەوە

ئاڤا نیوز

لە سەنتەری شاری دهۆك، پرۆژەی ڕووناكیی كارەبای 24 كاتژمێری گەیشتووەتە 81 هەزار هاوبەش، لەسەر ئاستی هەرێمی كوردستانیش نزیكەی 70%ـی هاوبەشانی كارەبا لە پرۆژەی ڕووناكی سوودمەند بوونە. هاوکات بەهۆی پرۆژەی ڕووناکییەوە، 310 موەلیدەی گەڕەکەکانی ئەو شارە كوژاوەتەوە.

وێنە گەورەكە: مانگی تشرینی دووەمی ساڵی ڕابردوو، مەسرور بارزانی، سەرۆکوەزیرانی هەرێمی کوردستان، پڕۆژەی ڕووناكیی کارەبای 24 كاتژمێریی ڕاگەیاند و بەپێی پڕۆژەکە؛ تا كۆتایی ساڵی 2026، تەواوی هاووڵاتیانی هەرێمی کوردستان لە پڕۆژەكە سوودمەند دەبن.

لێدوانی فەرمی: حازم محەممەد، جێگری بەڕێوەبەری گشتیی کارەبای پارێزگای دهۆک، ڕایگەیاند: "تا ئێستا پرۆژەی ڕووناكی بە 30 گەڕەكی سەنتەری شاری دهۆك گەیێنراوە، لە كۆی 118 هەزار هاوبەشی كارەباش لە شارەكە، 81 هەزار هاوبەش ئێستا خاوەنی كارەبای 24 كاتژمێرین كە دەكاتە 68%ـی كۆی ڕێژەی هاوبەشانی كارەبا لە شاری دهۆك."

جێگری بەڕێوەبەریی گشتیی كارەبای دهۆك ئاماژەی بەوەشكرد، تا كۆتایی ئەمساڵ، تەواوی سەنتەری شاری دهۆك، كارەبای بەردەوامییان پێ دەگات.

زانیاریی زیاتر: بەهۆی پڕۆژەی ڕووناکی، 310 مۆلیدە لە سەنتەری شاری دهۆك کوژێندراونەتەوە، كە ڕۆڵی كاریگەری هەیە لە پاكتركردنەوە  و ئارامكردنەوەی ژینگەی شارەکە.