قایمقامی هەولێر: ئەو چادرانەی  پێداویستی قوتابخانە دەفرۆشن قەدەغە دەکرێن

ئاڤا نیوز

بەوتەی قایمقامی هەولێر، ئەمساڵ ڕێگە بەو کەسانە نادرێت چادر هەڵبدەن بە مەبەستی فرۆشتنی کەلوپەل و پێداویستیی قوتابخانە.

چیرۆکی سەرەکی: ساڵانە لەگەڵ دەستپێکی ساڵی نوێی خوێندن، لە بەشێکی زۆری گەڕەکەکان، چادر هەڵدەدرێت و پێداویستی قوتابخانە بە نرخێکی هەرزان دەفرۆشن. بەڵام ئەمساڵ خاوەنی پەراوگەکان ناڕەزاییان دەربڕی و دەڵێن، بەهۆی ئەو چادرانەوە بازاڕیان نەماوە.

لێدوانی فەرمی: نەبەز عەبدولحەمید، قایمقامی قەزای ناوەندیی هەولێر بە ئاڤا میدیای وت، "ئەمڕۆ پێنجشەممە نووسراوێکمان بۆ شارەوانیی هەولێر کردووە. لە نووسراوەکە هاتووە ڕێگە بە دانانی چادر نادرێت بە مەبەستی فرۆشتنی کەلوپەلی قوتابخانە".

هۆکارە زانراوەکان: یەکێک لە خاوەنی پەراوگەکان بە ئاڤا میدیای وت، "ئێمە مانگانە کرێی دوکان و کارەبا و زەریبەمان لەسەرە، ساڵانە ئەو چادرانە هەڵدەدرێن و بە نرخێکی هەرزان پێداویستییەکان دەفرۆشن، چونکە هیچ کرێیەک نادەن و هیچ ئەرکێکیان لەسەر نییە، بۆیە چەند ساڵێکە زیانی زۆرمان پێدەگات".