ژمارەی زیارەتکارانی کەربەلا 22 ملیۆن کەس تێدەپەڕێنێت

ئاڤا نیوز

بەگوێرەی پێشبینیی سەرۆکی ئەنجوومەنی پارێزگای کەربەلا، ژمارەی زیارەتکارانی ڕێوڕەسمی چلەی ماتەمینیی ئیمام حوسێن (ئەربەعین) بۆ ئەمساڵ بگاتە زیاتر لە 22 ملیۆن کەس.

وێنە گەورەکە: بەبۆنەی چلەی ماتەمینی ئیمام حوسێن، ساڵانە ملیۆنان زیارەتکاری شیعەمەزهەب لە ناوخۆی عێراق و وڵاتانی جیهانەوە بەرەو شاری کەربەلا بەڕێدەکەون و سەردانی مەزارگەی ئیمام حوسێن دەکەن، ئەوەش بە یەکێک لە گرنگترین ڕووداوەکان لە مەزهەبی شیعە دادەنرێت.

لێدوانی فەرمی:  قاسم یەساری، سەرۆکی ئەنجوومەنی پارێزگای کەربەلا ڕایگەیاند: پێشبینی دەکەین کۆی گشتیی ژمارەی زیارەتکاران لە ڕێوڕەسمی چلەی ئەمساڵدا بگاتە نێوان 22 بۆ 23 ملیۆن کەس، لەنێویاندا نزیکەی پێنج ملیۆن زیارەتکار لە ئێران و وڵاتانی دیکەی ئیسلامییەوە هاتوون.

یەساری ئاماژەی بەوەشکرد،  پرۆسەی گەڕانەوەی زیارەتکاران لە سێ ڕێڕەوەوە دەستیپێکردووە، ئەوانیش بریتین لە ڕێڕەوی نەجەف، بابل و بەغدا. 

ئەوەی پێویستە بیزانیت: چلەی ماتەمینی ئیمامی حوسێن ئەمڕۆ دەستی پێکرد و کۆتایی بە ڕێوڕەسمەکە هات، بەڵام زیارەتکارانی شیعەمەزهەب چەند ڕۆژێکە لە ناوخۆی عێراق وڵاتانی دیکە سەردانی کەربەلایان کردووە.