پووتین: ترەمپ چالاکانە کار بۆ ئاسایی بوونەوەی دۆخی ئۆکراینا دەکات

ئاڤا نیوز

سەرۆکی ڕووسیا لەبارەی بەڕێوەچوونی کۆبوونەوەی لووتکەی نێوان ئەمریکا و ڕووسیا ڕایدەگەیێنێت، ئیدارەی دۆناڵد ترەمپ، "چالاکانە کار دەکەن بۆ ئەوەی دۆخەکە ئاسایی بکەنەوە و لەبارەی ئۆکراینا بگەینە ڕێککەوتن".

چیرۆکی سەرەکی: بڕیارە سبەی کۆبوونەوەی لووتکەی نێوان ڕووسیا و ئەمریکا لە ئالاسکا بەڕێوەبچێت لەبارەی ڕاگەیاندنی ئاگربەست و کۆتاییهێنان بەجەنگی سێ ساڵەی نێوان هەردوو وڵات.

لێدوانی فەرمی: ڤلادیمیر پووتین، سەرۆکی ڕووسیا ڕایگەیاند،" ئیدارەی دۆناڵد ترەمپ، سەرۆکی ئەمریکا چالاکانە کار دەکات بۆئەوەی ئۆکراینا و ڕووسیا بگەنە ڕێککەوتن و کۆتایی بە جەنگ بێنین و دووبارە دۆخی ناوچەکە و ئۆکراینا ئاسایی بکەینەوە".

پووتین ئاماژەی بەوەشدا، "ئێمە ئەوە بەدوور نازانین کە قۆناغی داهاتووی پەیوەندییەکان لەگەڵ واشنتن گەیشتن بە ڕێککەوتن بێت و  ئێمە کار دەکەین بۆ ڕەخساندنی هەلومەرجێک بۆ ئاشتی لە ناوچەکەدا".

ئەوەی پێویستە بیزانیت: سێ ساڵ زیاترە جەنگی نێوان ڕووسیا و ئۆکراینا بەردەوامە و ئێستا هەوڵەکان بۆ کۆتاییهێنان بەو جەنگە لەلایەن سەرۆکی ئەمریکاوە چڕتر کراوەتەوە.