منداڵێک لە مووسڵ بەهۆی پەلاماری سەگی بێلانە گیانی لەدەستدا

ئاڤا نیوز

سەرچاوەیەکی پزیشکی لە نەینەوا پشتڕاستی کردووەتەوە، منداڵێکی بچووک بەهۆی پەلاماری سەگی بێلانە لە ڕۆژهەڵاتی مووسڵ گیانی لەدەستدا.

زانیاریی بەدەستهاتوو: ئەو سەرچاوە پزیشکییە بە میدیاکانی عێراقی ڕاگەیاند، "منداڵەکە لە نزیک ماڵەکەی خۆی لە ناوچەی شەلالەت لە نزیک بایبۆختی ڕۆژهەڵاتی مووسڵ هێرشی کراوەتە سەر لەلایەن سەگی بێلانەوە و بەو هۆیەوە بە سەختی بریندار دەبێت و دەستبەجێ دەگەێنرێتە ناوەندێکی پزیشکی و سەرەڕای هەوڵی زۆر بۆ ڕزگارکردنی، گیانی لەدەستداوە".

زانیاریی زیاتر: لەماوەی چەند مانگی ڕابردوودا هێرشی سەگی بێلانە لە ناوچە جیاوازەکانی مووسڵ دووبارەبووەتەوە و چەندین منداڵ و ژنی بریندارکردوون، ئەمەش ناڕەزایی ڕای گشتیی لێکەوتووەتەوە و خەڵکەکە داوای چارەسەرکردنی بەپەلەی ئەم دیاردەیە دەکەن.