كریستیانەكان بەشداریكردنیان لە كابینەی نوێی حكومەت دووپات دەكەنەوە

ئاڤا نیوز

نۆ حیزب و لایەنی سیاسیی كریستیانیی هەرێمی كوردستان، بەشداریكردنیان لە كابینەی نوێی حكومەتی هەرێمی كوردستان دووپات دەكەنەوە، داواش لە سەرۆك بارزانی دەكەن ڕێگە نەدات میلیشیا و گرووپە چەكدارەكان لە هەڵبژاردنی پەرلەمانی عێراق، خۆیان بكەنە نوێنەری پێكهاتەی مەسیحییەکان.

چیرۆكی سەرەكی: نۆ حیزب و لایەنی سیاسیی پێكهاتەی كریستیانەكان كە پێكهاتوون لە: پارتی ئەنجوومەنی نیشتمانیی کلدان، پارتی بزووتنەوەی کۆبوونەوەی سریانەكان، پارتی یەکێتیی دیموکراتی کلدان، ڕەوتی شلاما، دەستەی کارگێڕیی ئەرمەن، ڕابیتەی جیهانی کلدان و کۆمەڵەی ئەرمەنی، بەبۆنەی ساڵیادی دامەزراندنی پارتی دیموكراتی كوردستان و ساڵڕۆژی لەدایكبوونی سەرۆك بارزانی، پەیامێكی پیرۆزباییان بڵاوكردەوە و ستایشی ڕۆڵی سەرۆك بارزانی دەكەن لە پاراستنی پێكهاتەكان و داكۆكیكردن لە مافەكانیان.

پەیامی فەرمی: لە بەشێكی ناوەڕۆكی پەیامەكەدا، هاوپەیمانیی مەسیحی، و ئەو لایەن و هێزانەی نوێنەرایەتییان لە ئۆرگانی سیاسی خۆیاندا هەیە، جەخت لە خەباتی سیاسی خۆیان دەكەنەوە بۆ هەمواركردنەوەی یاسای هەڵبژاردنی عێراق و ڕێگریكردن لە سنوورداركردنی دەنگی كورسیی كۆتای پێكهاتەكان.

زانیاریی زیاتر: گرنگترین بڕگەكانی پەیامی پێكهاتەی كریستیانەكان:

- جەخت لەوە دەكەینەوە، مەسیحییەكان نوێنەری ڕاستەقینەیان لە پەرلەمانی عێراق هەبێت و كەسانێكی نێو گرووپ و میلیشیا چەكدارەكان هەرگیز نوێنەرایەتیی پێكهاتەی كریستیانەكان ناكات.

- بە پەرۆشەوە هەوڵدەدەین بۆ پێکهێنانی کابینەی دەیەمی حکومەتی هەرێمی کوردستان لە زووترین کاتدا، هاوکات مسۆگەرکردنی شەراکەتی ڕاستەقینە و بەشداری کاریگەر و دادپەروەرانە بۆ گەلەکەمان لە هەموو ئاستەکاندا، بە سەرکردایەتیی سەرۆکی حکومەتی هەرێمی كوردستان، مەسرور بارزانی.

- یاسای ئێستای هەڵبژاردنی پەرلەمانی عێراق، ڕێگە بەو هێز و میلیشیایانە دەدات کە هیوای خێر بۆ گەلەکەمان و سەرجەم عێراق ناخوازن، دەست بەسەر کورسییەکانی پشکی مەسیحییەکان بگرن، وەک ئەوەی لە ڕابردوودا ڕوویدا، بەبێ هیچ ئیستحقاقێکی ئایینی و ئەخلاقی و نەتەوەیی ئەم دۆخەی ئێستا، سەرەڕای داواکارییە فەرمییەکانمان لە هەرسێ سەرۆکایەتییەکەی عێراق، کۆمیسیۆنی باڵای هەڵبژاردنەکان، کۆمیسیۆنی باڵای مافی مرۆڤ و دادگای فیدراڵی، جگە لەو بەڵێنانەی کە لەسەر زەمینە جێبەجێ نەکراون، هیچ ئەنجامێکی ئەرێنی جێی سەرنجیان نەبووە.

- هەڵوێستی مێژوویی سەرۆك بارزانی، بۆ پشتیوانی لە پێكهاتەی مەسیحییەكان لە سەرجەم وێستگە سیاسی و ئەمنی و سەربازییەكانی ساڵانی ڕابردوودا، هەمیشە جێگەی ڕێز و پێزانینە.

باکگراوند: پارتی دیموکراتی کوردستان لە 16ـی ئابی 1946 بەڕێبەرایەتیی مه‌لا مسته‌فا بارزانیی دامه‌زراوه‌. سه‌ره‌تا ناوی پارتی دیموكراتی كورد بووه‌ و له‌ كۆنگره‌ی سێیه‌مدا كه‌ له 1953-01-26 له‌ شاری كه‌ركووك به‌سترا بڕیار درا ناوی حزب بكرێته‌ (پارتی دیموكراتی كوردستان).