189 کاندید لە کێبەرکێی هەڵبژاردنی پەرلەمانی عێراق دوورخرانەوە

ئاڤا نیوز

کۆمیسیۆنی هەڵبژاردنەکانی عێراق بە ئاڤا میدیای ڕاگەیاند، 189 کاندید لە کێبەرکێی هەڵبژاردنی پەرلەمانی عێراق دوورخراونەتەوە، لەو ژمارەیەش 92 کاندیدیان بەهۆی بەڵگەی تاوان و بڕوانامەی ساختەوە لە هەڵبژاردنەکە بێبەشکراون.

وێنە گەورەکە: بڕیارە لە 11ـی تشرینی دووەمی 2025، هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، لە چوارچێوەی ڕێکارەکانی بەر لە هەڵبژاردن، کۆمیسیۆن تاوەکو ئێستا ژمارەیەک کاندیدی بەهۆکاری جیاجیا لە کێبڕکێکە دوورخستووەتەوە.

لێدوانی فەرمی: بیلال ئەکرەم عەباس، بەڕێوەبەری فەرمانگەی ڕاگەیاندن و پەیوەندییە جەماوەرییەکان لە کۆمیسیۆنی هەڵبژاردنەکانی عێراق بە ئاڤا میدیای ڕاگەیاند، ئەو 92 کاندیدەی لە کێبەرکێی هەڵبژاردن دوورخراونەتەوە بەهۆکاری وەک بەڵگەی تاوان و بوونی کێشە لە بڕوانامەکانیان بووە، ئەوانەشی ئاڵوگۆڕ کراون، بەهۆی کێشە لە بەڵگەنامەکانیان و هاوسەنگی ڕێژەی کۆتای ژنان ئاڵوگۆڕ کراون، ئەو ژمارانەش جێگیر نین و بە ڕۆژ و کاتژمێر زیاد و کەم دەکەن، چونکە ڕۆژانە ڕاپۆرتی شیاویەتی کاندیدەکان لەلایەن لایەنە فەرمییەکانەوە بۆ کۆمیسیۆن دەگەڕێتەوە.

- 88 کاندید بەهۆی بەڵگەی تاوان، چوار کاندید بەهۆی بڕوانامەی ساختە و 97 کاندیدی دیکەش بەهۆی کێشە لە بڕوانامەکانیان، مەرجەکانی کاندیدبوون، بڕوانامەکانیان و ڕێژەی کۆتای ژنانەوە بە کاندیدی دیکە ئاڵوگۆڕکراون.

- هەتا ڕۆژی دەنگدان هەر کاندیدێک شتێکی لەسەر ساغ ببێتەوە، بەگوێرەی ڕێکارەکان دەکرێت لە کێبەرکێی هەڵبژاردن دووربخرێتەوە یان ڕێکاری دیکەی یاسایی بەرامبەری بگیرێتەبەر.