سوپای ئیسرائیل دەست بە ئامادەکاری بۆ گواستنەوەی دانیشتووانی غەززە دەکات

ئاڤا نیوز

ئێوارەی ڕۆژی شەممە، سوپای ئیسرائیل ڕایگەیاند کە دەستی کردووە بە ئامادەکارییەکانی بۆ گواستنەوەی دانیشتووانی کەرتی غەززە لە ناوچەکانی شەڕەوە بەرەو باشوور، ئەم پڕۆسەیە لە سبەی یەکشەممەوە دەست پێدەکات.

وێنە گەورەکە: جەنگی نێوان حەماس و ئیسرائیل نزیک دەبێتەوە لە سێ ساڵ و بەهۆیەوە هەزاران کەس کوژراون و نزیکەی دوو ملیۆنی دیکەش ئاوارەبوون. ئێستا ئیسرائیل ئامادەکاری دەکات بۆئەوەی دانیشتووانی کەرتەکە بەرەو باشوور بگاوزێتەوە.

ڕاگەیێنراوی فەرمی: سوپای ئیسرائیل لە بەیاننامەیەکدا ڕایگەیاند، بەپێی ڕێنماییەکان ئامادەکاری دەکرێت بۆ دەستپێکردنی پڕۆسەی گواستنەوەکە لە سبەی یەکشەممەوە، ئەمەش بۆ پاراستنی ئاسایشی دانیشتووانی غەززەیە.

لەلایەکی دیکەوە: ئەفیخای ئەدرەعی، وتەبێژی سوپای ئیسرائیل، ئاماژەی بەوەدا کە دابینکردنی خێوەت و کەلوپەلی حەوانەوە بۆ دانیشتووانی کەرتەکە دەست پێدەکاتەوە. هەروەها ڕوونیکردەوە، گواستنەوەی ئەم کەلوپەلانە لەڕێگەی دەروازەی "کەرەم ئەبو سالم" و لەلایەن نەتەوە یەکگرتووەکان و ڕێکخراوە فریاگوزارییە نێودەوڵەتییەکانەوە دەبێت، دوای ئەوەی لەلایەن کارمەندانی دەروازە وشکانییەکانی سەر بە وەزارەتی بەرگریی ئیسرائیلەوە پشکنینی وردی بۆ دەکرێت.

ئەدرەعی جەختی لەوەش کردەوە، سوپای ئیسرائیل لەڕێگەی یەکەی هەماهەنگی کاروباری حکومەت لە ناوچەکاندا، بەردەوام دەبێت لە کارکردن بەپێی حوکمەکانی یاسای نێودەوڵەتی بۆ ڕێگەدان بە چوونەژوورەوەی هاوکارییە مرۆییەکان بۆ کەرتی غەززە.