ژمارەیەک پارچە زەوی دیکە لە سنووری هەولێر دابەش دەکرێن

ئاڤا نیوز

بەڕێوەبەرایەتی گشتیی شارەوانییەکانی هەولێر ئامادەکاریی دەکات بۆ ئەوەی ژمارەیەک پارچە زەوی دیکە، لە سنووری قەزای خەبات دابەش بکات و نزیكەی هەزار کەس سوودمەند دەبن.

وێنە گەورەکە: هەنگاوەکانی ئامادەکردنی و دابەشکردنی زەوی لە سنووری بەڕێوەبەرایەتی گشتیی شارەوانییەکانی هەولێر خێراتر کراوە، ئامانجەکە ئەوەیە پێش مانگی 10ی ئەمساڵ سەرجەم سوودمەندبووان لە سنووری هەر 35 قەزا و ناحییەکەی هەولێر تیروپشکی وەرگرتنی زەوییان بۆ بکرێت.

 

لێدوانی فەرمی: مەریوان حاکم هادی، بەڕێوەبەری گشتیی شارەوانییەکانی هەولێر؛ بە ئاڤای گوت، "ژمارەیەک پارچە زەوی کە دەورووبەری هەزار پارچە دەبێت، لە سنووری ناحیەی ڕزگاری سەر بە قەزای خەبات ئامادە دەکرێن و لەماوەی ڕۆژانی داهاتوو تیروپشک بۆ دابەشکردنیان دەکرێت.”

 

ئەوەی پێویستە بیزانیت: 42 هەزار فەرمانبەر، پێشمەرگە و خانەنشین لە سنووری بەڕێوەبەرایەتیی شارەوانییەکانی هەولێر لە پرۆسەی وەرگرتنی زەوی سوودمەند دەبن، 35 هەزار پارچە زەوی ئامادەکراون و زیاتر لە 10 هەزار و 500 کەس تیروپشکی وەرگرتنی زەوییەکانیان بۆ کراوە.