لە ماوەی کابینەی نۆیەم لە هەولێر هەزار و 214 پڕۆژە جێبەجێ كراون

ئاڤا نیوز

لە ماوەی دەستبەكاربوونی كابینەی نۆیەمی حكومەتی هەرێمی كوردستان، بڕی یەك تریلیۆن و 200 ملیار دینار، بۆ جێبەجێكردنی هەزار و 214 پڕۆژەی جۆراوجۆری خزمەتگوزاری لە سنووری پارێزگای هەولێر خەرج كراوە.

چیرۆكی سەرەكی: ئێوارەی ئەمڕۆ یەکشەممە 17ـی ئابی 2025، بە ئامادەبوونی د. ئومێد سەباح، سەرۆكی دیوانی ئەنجوومەنی وەزیرانی هەرێمی كوردستان، ئومێد خۆشناو، پارێزگاری هەولێر، كۆبوونەوەیەكی فراوان لەگەڵ قایمقامیەتی قەزاكان و بەڕێوەبەرایەتیی شارەوانییەكان و بەڕێوەبەرانی ناحیەكان و بەشێك لە بەڕێوەبەرایەتی فەرمانگە خزمەتگوزارییەكانی سنووری پارێزگای هەولێر ئەنجامدرا، مەبەست لێی؛ خزمەتکردنى زیاتری هاوڵاتییان و گرنگیدان بە پڕۆژەکانی پەرەپێدان و وەبەرهێنانى پارێزگای هەولێر بوو.

لێدوانی فەرمی: لەبارەی كۆبوونەوەكە و ئاستی پرۆژە خزمەتگوزارییەكانی پێنج ساڵی تەمەنی كابینەی نۆیەمی حكومەتی هەرێمی كوردستان، ئومێد خۆشناو، پارێزگاری هەولێر ڕایگەیاند، سەرباری كۆسپ و بەربەستە یەك لەدوای یەكەكان، ئەم كابینەیە لە ئەنجامدانی پڕۆژەی خزمەتگوزاری نەوەستاوە و تەنیا لە سنووری پارێزگای هەولێر، لەسەر بودجەی پەرەپێدان و وەبەرهێنانی پارێزگا و بودجەی ئاسایی، گوژمەی یەك تریلیۆن و 200 ملیار دینار بۆ هەزار و 214 پرۆژەی گرنگی جۆراوجۆر، خەرج كراوە.

زانیاریی زیاتر: چەندین پڕۆژەى دیکەى ستراتیژى ئێستا لە جێبەجێکردندان، لەوانەش: پڕۆژەى فریاگوزاریى خێرای گەیاندنى ئاوى هەولێر و دانان و دابەشکردنى تۆڕى ئاوى ناوخۆیی و بەستنەوەی هێڵە لاوەکییەکان بە هێڵە سەرەکییەکانى پڕۆژەى فریاگوزاریی و پڕۆژەکانى دروستکردنى دووسایدى (هەولێر - کۆیە)، (کەسنەزان - گۆمەسپان)، (گۆمەسپان – سماقووڵى) و ڕێگای (کۆڕێ - شەقڵاوە - قەندیل) و هەردوو تونێلى ( میراوە - ماوەران ).