كرێی هەڵسەنگاندنی زانستی و زمانەوانی ماستەر و دكتۆرا لە ئەستۆی قوتابی نامێنێت

ئاڤا نیوز

وەزارەتی خوێندنی باڵا و توێژینەوەی زانستی، بڕیارێك لە بەرژەوەندی قوتابیان و خوێندكارانی ماستەر و دكتۆرا دەردەكات؛ لەمەبەدوا كرێی هەڵسەنگاندنی زانستی و زمانەوانی بۆ توێژینەوە و تێزەكانیان، لەسەر داهاتی زانكۆكە خەرج دەكرێت و لە ئەستۆی قوتابی نامێنێت.

چیرۆکی سەرەکی: وەزارەتی خوێندنی باڵا و توێژینەوەی زانستیی هەرێمی كوردستان، وەڵامی نووسراوێكی زانكۆی پۆلیتەكنیكی سلێمانی داوەتەوە و تێیدا ئاماژە بەوە كراوە، پاڵپشت بە خاڵی حەوتەمی ڕێنمایی دارایی ژمارە (7)ـی ساڵی 2015، كرێی هەڵسەنگاندنی زانستی و زمانەوانی بۆ نامەی توێژینەوەی قوتابی، لەسەر داهاتی زانكۆكە خەرج دەكرێت.

نووسراوی فەرمی: بەپێی نووسراوێكی وەزارەتی خوێندنی باڵا و توێژینەوەی زانستیی هەرێمی كوردستان، بە ژمارە (15343) كە ئەمڕۆ دووشەممە ڕێككەوتی 18ـی ئابی 2025 دەرچووە و وێنەیەكی دەست ئاڤا میدیا كەوتووە، تێیدا ئاماژە بەوە كراوە، كرێی هەڵسەنگاندنی زانستی و زمانەوانی بۆ ماستارنامە و تێزی دكتۆرای قوتابیان لەسەر داهاتی زانكۆ خەرج دەكرێت و لە ئەستۆی قوتابی و خوێندكار نامێنێت.

ئەوەی پێویستە بیزانیت: كرێی هەڵسەنگاندنی زمانەوانی و زانستی بۆ هەر توێژینەوەیەك بڕەكەی 300 هەزار دینارە كە لە بەشی ژمێریاریی زانكۆكان لە قوتابی وەردەگیرا، ئەمەش بارگرانیی بۆ قوتابیانی ماستەر و دكتۆرا دروستكردبوو، بەتایبەت لە دۆخی خراپی دارایی هەرێمی كوردستان بەهۆی دابەشنەكردنی مووچە.

ئەوەش بزانە: پاڵپشت بەم نووسراوە ئەوانەی ئەو برە پارەیەیان لێوەرگیراوە، پێویستە لە لایەن زانکۆکانەوە بۆ قوتابی و خوێندکار بگەرێنرێتەوە.