ترەمپ و زێلێنسکی لە کۆشکی سپی کۆبوونەوە؛ "ئاشتی بەردەواممان دەوێت"

ئاڤا نیوز

بە ئامادەبوونی بەرپرسانی هەردوو وڵات، دۆناڵد ترەمپ، سەرۆکی ئەمریکا و ڤۆلۆدیمێر زێلینسکی، سەرۆکی ئۆکراینا لە کۆشکی سپی کۆبوونەوە، جەختیان لە ڕاگەیاندنی ئاگربەست لە ئۆکراینا کردەوە.

چیرۆکی سەرەکی: دوای کۆبوونەوەی لەگەڵ ڤلادیمێر پووتین، سەرۆکی ڕووسیا، ئەمڕۆ دووشەممە دۆناڵد ترەمپ، سەرۆکی ئەمریکا لە کۆشکی سپی لەگەڵ ڤلۆدیمێر زێلینسکی، سەرۆکی ئۆکراینا و بوشێک لە سەرکردەکانی ئەوروپا کۆبووەوە.

لێدوانە فەرمییەکان: دۆناڵد ترەمپ، سەرۆکی ئەمریکا ڕایگەیاند، گەلی ئۆکراینام خۆشدەوێت ئەوان کەسانی زیرەک و بەهێزن، هەروەها گەلی ڕووسیاشم خۆشدەوێت، دەمەوێت کۆتایی بە جەنگ بێت، ئەمریکا بەشدار دەبێت لە دابینکردنی گەرەنتی ئەمنی لە چوارچێوەی ڕێککەوتنی ئاشتی سەبارەت بە کۆتاییهێنان بە شەڕی ئۆکراینا و دوای کۆبوونەوەم لەگەڵ زێلینسکی و سەرکردەی وڵاتانی ئەوروپا پەیوەندی بە ڤلادیمێر پووتین سەرۆکی ڕووسیا دەکەم.

ترەمپ وتیشی، پێموانییە ئاگربەست ڕووبدات. دەتوانین گرێبەستێک بکەین کە ئامانجمان ئاشتی بێت لەکاتێکدا ئەوان شەڕ دەکەن. ئێمە باس لە گەرەنتی ئاسایش دەکەین و ئێمە دەتوانین بگەینە ڕێککەوتنێک بۆ ڕاگرتنی ململانێکان و لەگەڵ ئۆکراینا کار دەکەین، لەگەڵ هەمووان کار دەکەین، بۆ ئەوەی دڵنیا ببینەوە لەوەی ئەگەر ئاشتی هەبێت، ئەو ئاشتییە بۆ ماوەیەکی درێژخایەن دەمێنێتەوە نەک تەنیا بۆ دوو ساڵێک.

ڤۆلۆدیمێر زێلێنسکی، سەرۆکی ئۆکراینا ڕایگەیاند، پێویستمان بە هاوکاری بوونی هێزی ئەمریکا و زانیاری هەواڵگری و هاوکاریی سەربازی ئەمریکا هەیە بۆ گەرەنتی ئاسایشمان.

پێویستە ئەم شەڕە ڕابگرین و ڕووسیا ڕابگرین، ئێمە پشتگیری لە بیرۆکەی سەرۆک ترەمپ دەکەین بۆ وەستاندنی ئەم شەڕە و دۆزینەوەی چارەسەرێکی دیپلۆماسی و سوپاسی هەوڵەکانی دەکەین، ئێمە ئامادەین بۆ گفتوگۆی سێ قۆڵی لەگەڵ ئەمریکا و ڕووسیا.