حەماس ڕەزامەندی لەسەر ئاگربەست داوە و هێشتا ئیسرائیل وەڵامی نییە

ئاڤا نیوز

حەماس ڕەزامەندیدا لەسەر ئەو پێشنیازەی کە وڵاتانی نێوەندگیر بۆ ئاگربەستی 60 ڕۆژە لە کەرتی غەززە کردبوویان. چەند سەرچاوەیەک ناوەڕۆکی پێشنیازەکەیان ئاشكرا کردووە.

چیرۆکی سەرەکی: ڕۆژی دووشەممەی ئەم هەفتەیە، بزووتنەوەی مقاوەمەی ئیسلامی(حەماس) ڕەزامەندیی لەسەر پێشنیازەکەی قەتەر و میسر داوە سەبارەت بە ڕاگەیاندنی ئاگربەست بۆ ماوەی دوو مانگ لە کەرتی غەززە، لەبەرامبەردا ئیسرائیل هیچ هەڵوێستێکی فەرمیی نەنواندووە.

ڕاگەیێنراوی فەرمی: کەناڵی "جەزیرە"ی قەتەری ناوەڕۆکی پێشنیازەکەی قەتەر و میسڕی ئاشکرای کرد،  حەماس 10 بارمتەی زیندوو و تەرمی 18ـی دیکە بەرامبەر ئازادکردنی هەزار و 700 زیندانیی فەلەستینی ئازاد دەکات کە 45 زیندانییان سزای هەتاهەتایی و 15 زیندانی سزای درێژخایەنیان بەسەردا سەپێنراوە.

پێشنیازەکان بەمشێوەیەن:

لە ڕۆژەکانی سەرەتای ئاگربەستەکە حەماس هەشت بارمتەی زیندوو ئازاد دەکات

لە 50ـهەمین ڕۆژی ئاگربەستدا دوو بارمتەی دیکەی ئیسرائیل ئازاد دەکرێن، هەروەها تەرمی ئەو سەربازە ئیسرائیلییانەی کە کوژراون و لای حەماسن ڕادەستی ئیسرائیل دەکرێنەوە. 

پێویستە هێزەکانی ئیسرائیل بە دووری هەزار مەتر لە سنووری کەرتی غەززە و هەزار و 200 مەتریش لەو ناوچانەی شوێنی نیشتەجێبوونن بکشێنەوە. بەڵام ئیسرائیل پێداگری لەسەر مانەوەی لە بەیت حانوون و شوجاعیە.

ئازادکردنی هەزار و 500 زیندانییان لە دوای 7ـی ئۆکتۆبەری 2023 لەلایەن ئیسرائیلەوە دەستگیرکراون.

ئەمەش بزانە: نێوەندگرەکان بەڵێنیان داوە کاربکەن بۆ ڕێگریکردن لە گەڕانەوە بۆ شەڕ ئەگەر لە کاتی ئاگربەستی پێشنیازکراوی دوو مانگەدا ڕێکنەکەوتن لەسەر ئاگربەستی هەمیشەیی، بەڵام ئەم بڕگەیە لە ڕێککەوتنەکەدا دیاری نەکراوە.

لەلایەکی دیکەوە: ئیسرائیل نە ئەم پێشنیازەی قبوڵکردووە و نە ڕەتیکردووەتەوە، لەکاتێکدا سایتی هەواڵی (والا ئیسرائیلی) لە زاری سەرچاوە سەربازییەکانەوە ڕایگەیاندووە، نزیکەی 80 هەزار سەربازی ئیسرائیل بەشداری لە گەمارۆدانی غەززە دەکەن کە پێشتر بڕیاری داگیرکردنی دراوە.