بەرگریی شارستانی هۆکاری کۆنترۆلنەکردنی ئاگرەکەی هەڵەبجە ئاشکرا دەکات

ئاڤا نیوز

تا ئێستا ئاگرەکەی سنووری پارێزگای هەڵەبجە کۆنترۆل نەکراوە و بەرگریی شارستانیش هۆکارەکەی دەگەڕێنێتەوە بۆ سەختی ناوچەکە و خێرایی با و بوونی مین لەو سنوورە.

چیرۆکی سەرەکی: لە دوای نیوەڕۆی ڕۆژی یەکشەممەوە 17-8-2025، ئاگرێکی گەورە لە سنووری پارێزگای هەڵەبجە کەوتووەتەوە، بەهۆیەوە دوو کەس گیانیان لەدەستداوە و ڕووبەرێکی فراوان لە پوش و پاوان و دارستان سووتاون، تا ئێستاش نەتوانراوە ئاگرەکە کۆنترۆل بکرێت.

لێدوانی فەرمی: مقەدەم سەرکەوت کاڕەش، وتەبێژی بەڕێوەبەرایەتیی گشتیی بەرگریی شارستانیی هەرێمی کوردستان بە ئاڤای وت: لە ساتی دروستبوونی ئاگرەکە لەگەڵ تیمەکانمان لە بەرگریی شارستانیی هەڵەبجە لە پەیوەندی بووین و ئەو کەلوپەلانەی لایان نەبووە یان پێویستییان پێ هەبوو بۆمان ڕەوانە کردوون.

- "سەرۆکوەزیران و وەزیری ناوخۆ لە پەیوەندی بەردەوامن و ئەوەی پێویست بێت لە توانای مرۆیی و ئامێرەکان ئامادەمان کردووە".

- بەهۆی بەرزی پلەی گەرمی، سەختی شوێنی ئاگرەکە، خێرایی با و بوونی مین و پاشماوەی جەنگی لەو سنوورە ئاستەنگ لەبەردەم کۆنترۆلکردنی ئاگرەکە دروستبووە.

- لە هەولێرەوە ژمارەیەک ئامێر ڕەوانەی هەڵەبجە کراون.

- "مەترسی لەسەر هەر گوندێک دروست ببێت، دانیشتوانەکەی دەگوازینەوەی شوێنی سەلامەت".

- "هەر کات پێویست بە تیمی زیاتر بوو لە هەولێر و سلێمانییەوە تیم ڕەوانەی شوێنی ئاگرەکە دەکەین".

- "بەردەوام دەبین لە هەوڵەکانمان تاوەکو ئاگرەکە تەواو کۆنترۆل دەکرێت".