كۆمارییەكان لە سەردانی سوودانی بۆ ئەمریكا نیگەرانن

ئاڤا نیوز

 

ژمارەیەک ئەندامی كۆنگرێس داوا دەكەن بایدن دەستپێكردنەوەی هەناردەی نەوتی هەرێمی كوردستان بكاتە مەرجی سەردانی سوودانی بۆ ئەمریكا، پێشیان وایە ئیدارەی ئێستای ئەمریكا زیاتر گرنگی بە ئێران دەدات نەک ئیسرائیل.

 

وێنە گەورەکە: بڕیارە مانگی چواری ئەمساڵ محەممەد شیاع سوودانی سەرۆکوەزیرانی عێراق بە سەردانێک بگاتە ئەمریکا، سەردانەکەش کاردانەوەی جیاوازی دروستکردووە.

 

چیرۆکی سەرەکی: تۆم کۆتۆن، سیناتۆری کۆمارییەکان و حەوت هاوڕێی لە کۆنگرێس، نامەیەکیان ئاڕاستەی جۆ بایدن سەرۆکی ئەمریکا کردووە دوودڵی و نیگەرانی قوڵی خۆیان سەبارەت بە پلانی کۆشکی سپی بۆ میوانداری سەرۆکوەزیرانی عێراق دەربڕیوە، باس لەوەدەکەن میوانداری کردنی سوودانی لەم کاتەدا ئەو پەیامە دەگەیێنێت ئیدارەی بایدن گرنگی زیاتر بە ڕازیکردنی ئێران دەدات زیاتر لەوەی پشتیوانی ئیسرائیل بکات لە شکستپێهێنانی حەماس.

 

لێدوانی فەرمی: پێشتر کۆشکی سپی ئەوەی بڵاوکردبووەوە سەردانەکەی محەممەد شیاع سوودانی سەرۆکوەزیرانی عێراق لە ناوەڕاستی مانگی نیسان دەبێت و چەند پرسێک تاوتوێ دەکرێن.

بابەتی ستراتیژی: حکومەتی عێراق بەشێوەیەکی کارا لەگەڵ تاران دژی هاوپەیمانە کوردەکانمان کار دەکات، پێویستە جەخت لە کەمکردنەوەی هەژموونی ئێران بکەیتەوە لە عێراق و پاڵپشتی بۆ هاوبەشەکانمان لە کوردستان زیاد بکەیت. وەک پێشمەرجێک بۆ بینینی سوودانی، پێویستە داوای دەستبەجێ دەستپێکردنەوەی هەناردەی نەوت و ناردنی بەشە بودجەی هەرێمی کوردستان بکەیت. ئەمە بەشێکی نامەکەی ئەو ئەندامانەی کۆنگرێسە بۆ بایدن.