د. سامان بەرزنجی: لە هەولێر 108 کەس چاندنەوەی جگەریان بۆکراوە

ئاڤا نیوز

ئێستا لە هەرێمی کوردستان چاندنەوەی جگەر بۆ نەخۆش دەکرێت، وەزیری تەندروستی حکومەتی هەرێمی کوردستان لەوبارەیەوە دەڵێت، لە هەولێر 108 کەس چاندنەوەی جگەریان بۆ کراوە.

لێدوانی فەرمی: د. سامان بەرزنجی، وەزیری تەندروستیی حکومەتی هەرێمی کوردستان بە ئاڤا میدیای ڕاگەیاند: "بۆ یەکەمین جار لێرەوە دەمەوێت بیڵێم، خەرجی چاندنەوەی جگەر لەسەر ئەرکی حکومەتی هەرێمی کوردستانە و هەفتانە پارەی بۆ خەرج دەکرێت".

وەزیری تەندروستی وتیشی، تا ئێستا لە هەولێر 108 حکەس چاندنەوەی جگەریان بۆکراوە، تێچووی هەر یەک لەوانە نزیکەی 50 هەزار دۆلارە کە بەگوێرەی ئاست و جیاوازی باری نەخۆشەکە خەرجکراوە.

وەزیری تەندروستی ئاماژە بەوەش دەکات، پێنج ملیار و 500 ملیۆن دینارە لەلایەن سەرۆکوەزیران مەسرور بارزانی بۆ چاندنی جگەر خەرج کراوە.

ئەوەی پێویستە بیزانیت: لە کابینەی نۆیەمی حکومەتی هەرێمی کوردستان بۆ یەکەم جارە ئەم خزمەتگوزارییە چووەتە بواری جێبەجێکردنەوە.