نەتانیاهۆ پێشنیازەکەی میسر و قەتەر بۆ ئاگربەست لە غەززە ڕەت دەکاتەوە

ئاڤا نیوز

بنیامین نەتانیاهۆ، سەرۆکوەزیرانی ئیسرائیل پێشنیازەکەی هەر یەکە لە قەتەر و میسر سەبارەت بە ڕاگەیاندنی ئاگربەست و ئازادکردنی بەشێک لە بارمتەکانی ئەو وڵاتە ڕەتکردەوە.

وێنە گەورەکە: ڕۆژی دووشەممەی ئەم هەفتەیە، بزووتنەوەی مقاوەمەی ئیسلامی (حەماس) ڕەزامەندیی لەسەر پێشنیازەکەی قەتەر و میسر داوە سەبارەت بە ڕاگەیاندنی ئاگربەست بۆ ماوەی دوو مانگ لە کەرتی غەززە، لە بەرامبەردا سەرۆکوەزیرانی ئیسرائیل پێشنیازەکەی ڕەتکردەوە و جەختی لەسەر درێژەدان بە شەڕەکە دا.

ڕاگەیێنراوی فەرمی: دەستەی پەخشی ئیسرائیلی ڕۆژی سێشەممە لە زاری سەرچاوەیەکەوە لە نووسینگەی سەرۆکوەزیرانی ئیسرائیل ڕایگەیاند، ناتانیاهۆ ڕێککەوتنێکی بەشەکی ڕەتکردووەتەوە و داوای ئازادکردنی هەموو بارمتەکانی کردووە بە یەکجار و ڕایگەیاندووە، "یەک بارمتە بەجێناهێڵێت."

هۆکارە زانراوەکان: ڕەتکردنەوەی نەتانیاهۆ دوای ئەوە هات کە مەجید ئەنساری، وتەبێژی وەزارەتی دەرەوەی قەتەر پشتڕاستی کردەوە، "وەڵامی حەماس بۆ پێشنیازی میسر و قەتەر زۆر ئەرێنی بووە و ناوەڕۆکی پێشنیازەکە تاڕادەیەکی زۆر لەگەڵ ئەوەی ئیسرائیل پێشتر ڕەزامەندی لەسەر بووە. هەروەها لەگەڵ پێشنیازی ستیڤ ویتکۆف، نێردەی تایبەتی ئەمەریکا بە ڕێژەی 98% یەک دەگرێتەوە".

زانیاریی زیاتر: ڕێککەوتننامە پێشنیازکراوەکە بریتییە لە ڕاگرتنی ئۆپەراسیۆنە سەربازییەکان بۆ ماوەی 60 ڕۆژ، ڕێخۆشکردنی ڕێگە بۆ ڕێککەوتنێکی هەمەلایەن بۆ کۆتاییهێنان بە جەنگەکە کە نزیکەی دوو ساڵە بەردەوامە و ڕێگەدان بە گەیاندنی هاوکاری مرۆیی بۆ ناو کەرتی غەززە.