کۆبوونەوەکەی شاندی کوردستان و تەیف سامی کۆتاییهات

ئاڤا نیوز

 

کۆبوونەوەی شاندی هەرێمی کوردستان و تەیف سامی، وەزیری دارایی عێراق لەبارەی داهاتی نانەوتی کۆتاییهات و ئاڤا زانیویەتی کۆبوونەوەکە ئەرێنی بووە.

 

وێنە گەورەکە: بۆ جێبەجێکردنی ناوەڕۆکی لێکتێگەیشتنی نێوان هەرێمی کوردستان و عێراقی فیدڕاڵ، کۆبوونەوەکانی نێوان شاندەکانی هەردوولا بەردەوامە و لە گەیشتن بە ڕێککەوتنی کۆتایی نزیک بوونەتەوە.

 

زانیاریی زیاتر: ئاڤا زانیویەتی کۆبوونەوەکە لە باڵەخانەی وەزارەتی پلاندانانی عێراق بووە، لە کۆبوونەوەکە محەممەد تەمیم، وەزیری پلاندانانی عێراق بەشداری کردووە. 

 

-کۆبوونەوەکە پێش کاتژمێر 10ـی  ئەمڕۆ بەیانی دەستیپێکرد و کاتژمێر دوو لەگەڵ کۆتایی هاتنی دەوامی فەرمی کۆبوونەوەکەش کۆتایی هات، واتە زیاتر لە چوار کاتژمێری خایاندووە.

 

زانیاریی بەدەستهاتوو: بەگوێرەی زانیارییەکانی پەیامنێری ئاڤا، دەروون مەلا ناجی لە بەغدا، کە لە سەرچاوەیەکی شاندی هەرێمی کوردستان دەستیکەوتووە، کۆبوونەوەکە ئەرێنی بووە  و لێکتێگەیشتن و نزیکبوونەوەی باش لەنێوان هەردوولا دروست بووە.

 

هەنگاوی داهاتوو: بڕیارە شاندەکە ئەمڕۆ بگەڕێنەوە هەرێمی کوردستان و سەرەتای هەفتەی داهاتووش دووبارە بگەڕێنەوە بەغدا و بگەنە ئەنجامی کۆتایی.