ژمارەیەک فەرمانبەری دیکەی ئاکرێ ڕەزامەندی وەرگرتنی زەوییان بۆ دەردەچێت

ئاڤا نیوز

لە چوارچیوەی پرۆسەی دابەشکردنی زەوی بەسەر فەرمانبەران، هەزار و 630 فەرمانبەری دیکەی سنووری قەزای ئاکرێ ڕەزامەندی وەرگرتنی زەوییان بۆ دەرچووە.

وێنە گەورەکە: هەنگاوەکانی پرۆسەی دابەشکردنی زەوی بەسەر فەرمانبەران بەردەوامە، ئەو کەسانەی مەرجەکانی پێدانی زەوی بیانگرێتەوە، پارچەیەک زەوییان پێدەدرێت.

لێدوانی فەرمی: بڵند ڕەزا، سەرۆکی شارەوانیی ئاکرێ بە ئاڤا میدیای وت: هەزار و 630 فەرمانبەری دیکەی سنووری قەزای ئاکرێ ڕەزامەندی وەرگرتنی زەوییان بۆ دەرچووە.

- "ئێستا کار لەسەر تەرخانکردنی زەوی و تەواوکردنی ڕێکارەکانی کوژانەوەی ئەو زەوییانە دەکەین کە بۆ دابەشکردن بەسەر فەرمانبەران دیاریکراون".

ئەوەی پێویستە بیزانیت: لە سنووری قەزای ئاکرێ نزیکەی دوو هەزار و 500 پارچە زەوی بۆ دابەشکردن بەسەر فەرمانبەران ئامادە کراون و کار لەسەر چەند نەخشەیەکی دیکەی کەرتی دەکرێت بۆ ئەوەی زەوی پێویست ئامادە بکرێت.

باکگراوند: لە سنووری قەزای ئاکرێ بە سێ قۆناغ زیاتر لە حەوت هەزار فەرمانبەر ڕەزامەندی وەرگرتنی زەوییان بۆ دەرچووە، بەمجۆرە:

قۆناغی یەکەم: هەزار و 36

قۆناغی دووەم: چوار هەزار و 548

قۆناغی سێیەم: هەزار و 630