ڕۆژانە 120 گەشتی ئاسمانی لە فڕۆکەخانەکانی عێراق و کوردستانەوە ئەنجام دەدرێن

ئاڤا نیوز

وەزارەتی گواستنەوەی عێراق دەڵێت، لە فڕۆکەخانەکانی عێراق و هەرێمی کوردستان ڕۆژانە زیاتر لە 120 گەشتی ئاسمانی ئەنجام دەدرێن، ڕۆژانەش دەوروبەری 765 فڕۆکەی گەشتیاریی و بازرگانیی ئاسمانی عێراق بۆ گەشتە نێودەوڵەتییەکانیان بەکاردەهێنن.

وێنە گەورەکە: لە عێراق و هەرێمی کوردستان ئێستا شەش فڕۆکەخانە هەن کە کار کاردەکەن، چوار فڕۆکەخانەی دیکەش لە قۆناغی دروستکردن و دەستبەکاربوون دان، بەشێک لە فڕۆکەخانەکانیش بەهۆی کەمی گەشتەکانیان ڕووبەڕووی ڕەخنە بوونەتەوە و بەوتەی لیژنەی گواستنەوەی پەرلەمانی عێراق، دروستکردنیان هیچ سوودێکی ئابووری بۆ وڵات نەبووە.

لێدوانی فەرمی: مەیسەم سافی، وتەبێژی وەزارەتی گواستنەوەی عێراق بە ڕۆژنامەی 'سەباح'ـی ڕایگەیاند، ئێستا ڕۆژانە دەوروبەری 765 فڕۆکەی گەشتیاریی و بازرگانیی ئاسمانی عێراق بۆ گەشتە نێودەوڵەتییەکانیان بەکاردەهێنن، هۆکارەکەشی بۆ ئارامی دۆخی ئاسایش و ئارامی عێراق دەگەڕێتەوە.

خاڵە ئەرێنییەکان: ئێستا ڕۆژانە زیاتر لە 120 گەشتی ئاسمانی لە فڕۆکەخانەکانی عێراقەوە ئەنجام دەدرێن، بەکردنەوەی فڕۆکەخانەکانی ناسرییە، کەربەلاو نەینەواش لە داهاتوودا، ژمارەی گەشتەکان بەڕێژەیەکی بەرچاو زیاتر دەبێت.