دادگایی شاسوار عەبدولواحید جارێکی دیکە دواخرا

ئاڤا نیوز

بڕیاربوو ئەمڕۆ پێنجشەممە دادگایکردنی سەرۆکی جووڵانەوەی نەوەی نوێ لە سلێمانی بەڕێوەبچێت و پەیامنێری ئاڤا وتی 'دادگاییەکە دواخرا'.

چیرۆکی سەرەکی: کاتژمێر 10ـی شەوی 12ـی ئاب، هێزە ئەمنییەکانی سلێمانی، شاسوار عەبدولواحید سەرۆکی جووڵانەوەی نەوەی نوێیان لە ماڵەکەی خۆی لە گوندی ئەڵمانی دەستگیر کرد، دواتر هۆکاری دەستگیرکردنەکەیان بۆ تۆمارکردنی ژمارەیەک سکاڵا گەڕاندەوە.

زانیاریی پەیامنێر: چۆمان مەحموود، پەیامنێری ئاڤا لە سلێمانی ڕایگەیاند: بڕیاربوو ئەمڕۆ پێنجشەممە لە دادگای کەتنی دووی سلێمانی، شاسوار عەبدولواحید سەرۆکی جووڵانەوەی نەوەی نوێ دادگایی بکرێت، بەڵام دادگاییەکەی بۆ ڕۆژی 28ـی ئەم مانگە دواخرا.

هۆکارە زانراوەکان: هۆکاری دواخستنی دادگاییەکە بۆ ئەوە دەگەڕێتەوە، کە دادوەر لە شاسوار عەبدولواحیدی پرسیوە ئایا فلاش میمۆرییەکە لە کوێیە؟، لەبەرامبەردا سەرۆکی جووڵانەوەی نەوەی نوێ داوای لە دادوەرەکە کردووە، کە جارێکی دیکە دۆسییەکەی بۆ بخوێنێتەوە، بەڵام دادوەرەکە وتووتەیتی 'پێشتر دۆسیەکەم بۆ خوێندیتەوە'، بۆیە شاسوار عەبدولواحیدیش بە دادوەرەکەی وتووە 'من وەڵامی هیچ پرسیارێکت نادەمەوە'.

لەلایەکی دیکەوە: هۆکارێکی دیکەی دواخستنی دادگاییەکە بۆ ئەوە دەگەڕێتەوە، کە هەموو بەڵگە و دۆسییەکان وەک پێویست نەخرابوونە بەردەستی دادوەر.